ប្រភពថា ទីតាំងល្បែងនេះ ចាប់ផ្តើមដំណើរការទទួលអតិថិជនដែលជាអ្នកញៀនល្បែងឡើងវិញហើយ ដោយក្នុងមួយថ្ងៃៗ មានអ្នកចូលលេងល្បែងរាប់សិបនាក់ និងភ្នាល់ប្រាក់រាប់លានរៀល ពេលចាញ់ឈ្នះហូរកញ្ជ្រៀវអ៊ឹងកង យ៉ាងទ្រហឹង និងបង្កផលប៉ះពាល់ពលរដ្ឋជិតខាងជាខ្លាំង។

បើតាមប្រជាពលរដ្ឋនៅតំបន់នោះ សង្ឃឹមលើលោកមេប៉ុស្តិ៍ លោកចៅសង្កាត់ក្រពាំងក្រសាំង នឹងលោកអធិការខណ្ឌពោធិ៍សែនជ័យ មានចំណាត់ការ បើបនល្បែងនៅតែបន្តលេងគគ្រឹកគគ្រេងពេញមូលដ្ឋាន ថ្នាក់ក្រោមមិនអើពើបង្ក្រាប នោះពលរដ្ឋនឹងស្នើសុំ លោកជួន ណារិនមានចំណាត់ការ ។

ប្រភពបន្តទៀតថា មួយរយ:ចុងក្រោយនេះ សមត្ថកិច្ច ខណ្ឌពេាធិ៍សែនជ័យ ហាក់បីកំពុងលេងសើចបទបញ្ជា របស់រាជរដ្ឋាភិបាល ក្នុងការមិនទប់ស្កាត់ និងបង្ក្រាបល្បែងស៊ីសងគ្រប់ប្រភេទ។

ដើម្បីធានាឲ្យជនគ្រប់រូប និងសង្គមទាំងមូលមានសុវត្ថិភាពយ៉ាងល្អប្រសើរ ជីវភាពរុងរឿង និងសុខដុមរមនា រាជរដ្ឋាភិបាលកម្ពុជាបានសម្រេចដាក់ចេញនូវគោលនយោបាយ «ភូមិ ឃុំ សង្កាត់ មានសុវត្ថិភាព» ចំនួន៧ចំណុច ដែលក្នុងនោះក៏រួមមានគ្មានបទល្មើស លួច ឆក់ ប្លន់ គ្រឿងញៀនល្បែងស៊ីសងខុសច្បាប់ និងបទល្មើសគ្រប់ប្រភេទ។

ដូច្នេះប្រសិនបើមន្ត្រីអាជ្ញាធរ ក៏ដូចជាសមត្ថកិច្ចមូលដ្ឋាន មិនព្រមធ្វើការបង្ក្រាបល្បែងស៊ីសងនៅក្នុងមូលដ្ឋាន របស់ខ្លួននោះទេ គឺបង្ហាញយ៉ាងច្បាស់ថា អាជ្ញាធរនិងសមត្ថកិច្ចមូលដ្ឋានទាំងនោះ មានការបើកភ្លើងខៀវដោយពុំបានអនុវត្តគោលនយោបាយ ដែលរាជរដ្ឋាភិបាលដាក់ចេញនោះទេ ៕