|
លោក ឡាយ សំកុល កោតសរសើរចំពោះកិច្ចខិតខំប្រឹងប្រែងអគ្គលេខាធិការដ្ឋានព្រឹទ្ធសភា ដែលបានចូលរួមក្នុងការរៀបចំព្រឹត្តិការណ៍ដ៏មានសារសំខាន់នៅខែសីហា
ថ្ងៃទី ៖ 07-09-2026, ដោយ Dara007 , 34 Views
ភ្នំពេញៈ លោក ឡាយ សំកុល កោតសរសើរចំពោះកិច្ចខិតខំប្រឹងប្រែងអគ្គលេខាធិការដ្ឋានព្រឹទ្ធសភា និងសហការីទាំងអស់ ដែលបានចូលរួមក្នុងការរៀបចំព្រឹត្តិការណ៍ដ៏មានសារសំខាន់នៅខែសីហា ឆ្នាំ២០២៦ ដើម្បីបញ្ជាក់ឱ្យឃើញពីសមត្ថភាព ក៏ដូចជាការលើកកម្ពស់កិត្យានុភាពជាតិកម្ពុជា លើឆាកអន្តរជាតិ។
ថ្លែងក្នុងកិច្ចប្រជុំបូកសរុបលទ្ធផលការងាររបស់អគ្គលេខាធិការដ្ឋានព្រឹទ្ធសភា ប្រចាំខែសីហា និងលើកទិសដៅការងារខែកញ្ញា ឆ្នាំ២០២៦ នៅសាលភក្តីវិក្រម១ នៃវិមានព្រឹទ្ធសភា ដោយមានការអញ្ជើញចូលរួមពីថ្នាក់ដឹកនាំអង្គភាពចំណុះអគ្គលេខាធិការដ្ឋានចាប់ពីប្រធាននាយកដ្ឋានឡើង នាព្រឹកថ្ងៃចន្ទ ទី៧ ខែកញ្ញា ឆ្នាំ២០២៦ លោក ឡាយ សំកុល អគ្គលេខាធិការព្រឹទ្ធសភា មានប្រសាសន៍ថា ក្នុងខែសីហា ឆ្នាំ២០២៦នេះ ព្រឹទ្ធសភាបានសម្រេចបាននូវការរៀបចំព្រឹត្តិការណ៍ និងកិច្ចសំខាន់ៗ មានដូចខាងក្រោម៖ ១-ព្រះរាជពិធីសម្ពោធដាក់ឱ្យប្រើប្រាស់ជាផ្លូវការនូវអគារ «វិមានសាមគ្គីភាព» នៃព្រឹទ្ធសភា ក្រោមព្រះរាជាធិបតីភាពដ៏ខ្ពង់ខ្ពស់ជាទីបំផុតរបស់ព្រះមហាក្សត្រ នៃព្រះរាជាណាចក្រកម្ពុជា ដែលបានប្រព្រឹត្តទៅដោយរលូន និងជោគជ័យ។ ២-រៀបចំប្រកបដោយភាពជោគជ័យនូវសន្និសីទប្រធានសភា នៃអន្តរសភា លើកទី២ (ISC-2) កាលពីថ្ងៃទី២៦-២៨ ខែសីហា ថ្មីៗនេះដែលកម្ពុជាយើងធ្វើជាម្ចាស់ផ្ទះ។
ការណ៍នេះ បានបញ្ជាក់ឱ្យឃើញពីសមត្ថភាព ក៏ដូចជាការលើកកម្ពស់កិត្យានុភាពជាតិកម្ពុជា លើឆាកអន្តរជាតិ។ ជាមួយគ្នានោះផងដែរ លោកក៏បានសម្តែងនូវការកោតសរសើរចំពោះកិច្ចខិតខំប្រឹងប្រែងរបស់ថ្នាក់ដឹកនាំនៃអគ្គលេខាធិការដ្ឋានព្រឹទ្ធសភា និងសហការីទាំងអស់ ដែលបានចូលរួមក្នុងការរៀបចំព្រឹត្តិការណ៍ដ៏មានសារសំខាន់នេះ។
បន្ថែមទៀត លោក បានលើកឡើងនូវទិសដៅការងារបន្ត ដូចខាងក្រោម៖ ១-ការត្រៀមរៀបចំដំណើរទស្សនកិច្ចរបស់ថ្នាក់ដឹកនាំព្រឹទ្ធសភា អញ្ជើញបំពេញទស្សនកិច្ចនៅក្រៅប្រទេស និងចូលរួមកិច្ចប្រជុំមហាសន្និបាតលើកទី១៥៣ នៃសហភាពអន្តរសភា (153rd IPU Assembly)។ ២-ការត្រៀមរៀបចំទទួលបដិសណ្ឋារកិច្ចផ្លូវរដ្ឋរបស់ ឯកឧត្តមប្រធានាធិបតី នៃសាធារណរដ្ឋសហភាពមីយ៉ាន់ម៉ា នៅព្រះរាជាណាចក្រកម្ពុជា នាពេលខាងមុខ៕
|