ថ្លែងក្នុងឱកាសបើកសម័យប្រជុំ លើកទី៤៨ នៃសន្និសីទរដ្ឋមន្ត្រីហ្វ្រង់កូហ្វូនី នៅមុនកិច្ចប្រជុំកំពូលហ្វ្រង់កូហ្វូនី លើកទី២០ នៅថ្ងៃទី១៤ ខែវិច្ឆកា ឆ្នាំ២០២៦នេះ លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ មានប្រសាសន៍ថា គ្មាននរណាម្នាក់ខ្លាំងជាងគេរហូត គ្រប់រដូវកាលនោះទេ។ ដូច្នេះ សន្តិភាព មិនអាចពឹងផ្អែក តែលើទំនាក់ទំនង នៃអំណាច ឬកម្លាំងនោះឡើយ។

ជាមួយគ្នានេះ លោក បានសង្កត់ធ្ងន់ថា សន្តិភាព ត្រូវឈរលើមូលដ្ឋាន នៃច្បាប់អន្តរជាតិ ការគោរពអធិបតេយ្យភាព និងបូរណភាពទឹកដីរបស់រដ្ឋ ក៏ដូចជាការដោះស្រាយវិវាទដោយសន្តិវិធី។ នេះគឺជាគោលការណ៍ ដែលអាចការពារប្រទេសធំ ក៏ដូចជាប្រទេសតូច ដោយមិនប្រកាន់ថា ស្ថិតក្នុងកាលៈទេសៈណាក៏ដោយ។ លោកអះអាងថា សន្តិភាព មិនមែនគ្រាន់តែជាការអវត្តមាននៃសង្គ្រាមប៉ុណ្ណោះទេ។

សន្តិភាព ក៏ពឹងផ្អែកលើទំនុកចិត្តចំពោះស្ថាប័ន ការអប់រំ និងឱកាសអនាគត ដែលផ្តល់ជូនប្រជាជនរបស់យើង ជាពិសេសស្ត្រី និងយុវជនផងដែរ។

បន្ថែមលើនេះ លោក បានគូសបញ្ជាក់ទៀតថា វិបុលភាពប្រកបដោយចីរភាព មិនអាចកើតមានឡើង ដោយគ្មានសន្តិភាព ហើយសន្តិភាពពិតប្រាកដ ក៏មិនអាចមានឡើង ដោយគ្មានការអភិវឌ្ឍ និងសាមគ្គីភាពនោះដែរ៕