ថ្លែងក្នុងពិធីអបអរសាទរខួប ៨០ឆ្នាំ នៃការបង្កើតសាកលវិទ្យាល័យវិទ្យាសាស្ត្រសុខាភិបាល និងសម្ពោធអគារសិក្សាថ្មីចំនួន ២ខ្នង នៅព្រឹកថ្ងៃពុធ ទី៧ ខែតុលា ឆ្នាំ២០២៦ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាមានប្រសាសន៍ថា ឆ្នាំ២០២៨ រដ្ឋនឹងទទួលខុសត្រូវ លើសាលាជាង១០១៤សាលា ដើម្បីចំណាយថវិកាសម្រាប់ផ្ដល់អាហារូបត្ថម្ភឧបត្ថម្ភដល់កុមារនៅបឋមសិក្សាមួយចំនួន ពិសេសនៅតាមជនបទឱ្យទទួលបានអាហារគ្រប់គ្រាន់។
សម្ដេចធិបតីបានបញ្ជាក់ថា កម្មវិធីនេះ រាជរដ្ឋាភិបាលនឹងពង្រីកជាជំហានៗ មិនមានគ្រោងដកចេញវិញនោះទេ ហើយថែមប្រមូលទិញកសិកផលពលរដ្ឋពីមូលដ្ឋានសម្រាប់ម្ហូបអាហារឱ្យកុមារបន្ថែមទៀត។
ទន្ទឹមនឹងនេះ សម្ដេចធិបតី បានគូសបញ្ជាក់ថា បច្ចុប្បន្ននេះ មានសិស្សតូចៗប្រមាណ ៣០ម៉ឺននាក់ នៅសាលាជាង ១ពាន់សាលា កំពុងទទួលអាហារូបត្ថម្ភឧបត្ថម្ភដោយរាជរដ្ឋាភិបាលផងដែរ។
«ចំពោះកម្មវិធីការឧបត្ថម្ភសាច់ប្រាក់ពីរាជរដ្ឋាភិបាល ចាប់ពីមានផ្ទៃពោះ រហូតដល់កូនអាយុ២ឆ្នាំ មកដល់ម៉ោងនេះ យើងបានគ្របដណ្ដប់ពីចុងឆ្នាំ២០២៣ យើងមានកុមារតេ១១ម៉ឺននាក់ទេទទួលផល អ៊ីចឹង៣ឆ្នាំនេះ យើងបង្កើន១ជា៣ ឡើងទៅ៣០ម៉ឺននាក់ ដែលបានទទួលផលនេះ គឺជាគោលនយោបាយដែលបងប្អូនប្រជាពលរដ្ឋយល់ថា ជាអាទិភាព និងជាការអនុវត្ដជាក់ស្ដែងរបស់រាជរដ្ឋាភិបាលជួយដល់កូនចៅប្រជាពលរដ្ឋ និងកុមាររបស់យើង»៕