រដ្ឋមន្ត្រីការបរទេសថៃ លោក Sihasak Phuangketkeow បានជួបជាមួយស្នងការជាន់ខ្ពស់អង្គការសហប្រជាជាតិទទួលបន្ទុកសិទ្ធិមនុស្ស លោក Volker Türk នៅទីក្រុងហ្សឺណែវ កាលពីថ្ងៃទី ៥ ខែធ្នូ ក្នុងអំឡុងពេលកិច្ចប្រជុំអនុសញ្ញាអូតាវ៉ា។

ក្រៅពីការចោទប្រកាន់កម្ពុជាទាក់ទងនឹងការដាក់មីនថ្មី លោក Sihasak បានឆ្លៀតបកស្រាយពីការបន្តឃុំខ្លួនទាហានខ្មែរ ១៨ នាក់ ដោយអះអាងថា ពួកគេកំពុងទទួលបានការព្យាបាលស្របតាមច្បាប់មនុស្សធម៌អន្តរជាតិ។

លោកបានបន្ថែមថា ថៃបានអនុញ្ញាតឲ្យគណៈកម្មាធិការអន្តរជាតិកាកបាទក្រហម (ICRC) ចូលជួបអ្នកដែលត្រូវបានឃុំខ្លួនជានិច្ច។ គិតត្រឹមថ្ងៃអាទិត្យនេះ ទាហានកម្ពុជា ១៨ នាក់ត្រូវបានថៃឃុំខ្លួនអស់រយៈពេល ១៣១ ថ្ងៃហើយ។

ក្រសួងការពារជាតិកម្ពុជានៅតែបន្តអំពាវនាវយ៉ាងទទូចឲ្យភាគីថៃគោរពឲ្យបានម៉ឺងម៉ាត់ ស្មោះត្រង់ និងដោយសុច្ឆន្ទៈពិតប្រាកដនូវសេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងប្រទេសទាំងពីរ៕