ពលរដ្ឋក្នុងភូមិតាំងតាឡាត់នៃឃុំព្នាយ ស្រុកសំរោងទង ខេត្តកំពង់ស្ពឺបានស្នើសុំឱ្យអាជ្ញាធរពាក់ព័ន្ធគ្រប់លំដាប់ថ្នាក់ជួយអន្តរាគមន៍ផង ខណៈផ្លូវដែលពួកគាត់ធ្លាប់តែដឹកជញ្ជូនផល អនុផលត្រូវបានរងការធ្វើរបងថ្មបិទជិត និងអូរធម្មជាតិដែលធ្លាប់តែរកផលនេសាទត្រូវបានក្រុមហ៊ុនមួយរំលោភបំពានដោយចាក់ចូល សង់របងក្នុងអូរនិងបិទផ្លូវមិនឱ្យចរាចរណ៍បានដូចមុន។

ប្រាប់អ្នកយកព័ត៌មានយើងនៅព្រឹកថ្ងៃទី៧ ខែមករា ឆ្នាំ២០២៦ ពលរដ្ឋក្នុងលក្ខខណ្ឌមិនបញ្ចេញឈ្មោះ បានប្រាប់ថា ខ្នងប្រឡាយភ្លោះដែលអាជ្ញាធរបានកាយនិងរៀបចំទុកឱ្យពលរដ្ឋធ្វើដំណើរ ដឹកផល អនុផលត្រូវបានក្រុមហ៊ុនមួយសង់របងថ្មបិទជិតមិនឱ្យចរាចរដូចមុនបានទៀតទេ។រីឯអូរធម្មជាតិតាំងតាឡាត់ដែលមានប្រភពមកពីទំនប់ចាន់ថ្នាលក៏ត្រូវបានចាក់ដីលុបរំលោភយកអស់ជាងពាក់កណ្តាល(ជិត៤ម៉ែត្រ) ហើយបច្ចុប្បន្នក៏កំពុងសង់របងក្នុងអូរផងដែរ។

ពលរដ្ឋកើតការឆ្ងល់ថា តើអាជ្ញាធរពាក់ព័ន្ធបានដឹងពីការសាងសង់របស់ក្រុមហ៊ុននេះដែរឬទេ ?ឬក៏បានចូលរួមក្នុងការបើកភ្លើងខៀវឱ្យក្រុមហ៊ុនមួយនេះមានលទ្ធភាពក្នុងការសាងសង់រំលោភផ្លូវខ្នងប្រឡាយដែលពលរដ្ឋចរាចរណ៍រាល់ថ្ងៃនិងចំណីអូរធម្មជាតិរបស់រដ្ឋ។មន្ទីរធនធានទឹកនិងឧតុនិយមដែលតែងសកម្មក្នុងការ ការពារបឹងបួរ ប្រឡាយអូរ ដើម្បីប្រយោជន៍រួមហាក់ជាប់គាំងមិនអើពើរ អសកម្មលើករណីនេះដោយមិនដឹងមូលហេតុ តែពលរដ្ឋថាកំពុងសកម្មក្នុងការដឹកដីពីទំនប់ចាន់ថ្នាល់មកចាក់ក្នុងការដ្ឋាននេះក្នុងមួយថ្ងៃរាប់រយឡាន៕