លោក សុខ វាសនា អគ្គនាយកនៃអគ្គនាយកដ្ឋានអន្តោប្រវេសន៍បានឲ្យដឹងនៅថ្ងៃទី៣០ ខែមិថុនា ថា បន្ទាប់ពីភាគីថៃបានប្រកាសបិទច្រកព្រំដែនជាឯកតោភាគីនៅតាមបណ្តាខេត្តទាំង៧ដែលមានព្រំប្រទល់ជាប់ជាមួយថៃកាលពីថ្ងៃទី២៣ខែមិថុនា រួចមក គឺជាមធ្យមក្នុងមួយថ្ងៃៗមានពលរដ្ឋខ្មែរត្រឡប់មកវិញប្រមាណពី២៥០០ទៅ៣០០០នាក់ ។

លោកបន្តថា ចំពោះប្រជាពលរដ្ឋថៃត្រឡប់ទៅប្រទេសកំណើតខ្លួនឯងវិញ មានប្រមាណជា២០០ទៅ៣០០នាក់ក្នុងមួយថ្ងៃៗ ។

ចំពោះការផ្សព្វផ្សាយថា មានពលរដ្ឋខ្មែរ២នាក់ស្លាប់ដោយសារតែការរង់ចាំត្រឡប់មកកម្ពុជាវិញនោះ ឯកឧត្តម សុខ វាសនា បានអះអាងថា ជាព័ត៌មានមិនពិត គ្មានពលរដ្ឋខ្មែរណាស្លាប់នោះទេ ។

គួរបញ្ជាក់ថា កាលពីថ្ងៃទី២៣ ខែមិថុនា យោធាថៃបានសម្រេចចិត្តបិទទ្វារព្រំដែនជាឯកតោភាគីដោយគ្មានជូនដំណឹងមកសមត្ថកិច្ចកម្ពុជានៅតាមបន្ទាត់ព្រំដែននោះ គឺទាំងសម្តេចតេជោ ហ៊ុន សែន ប្រធានព្រឹទ្ធសភា និងសម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជាបានប្រកាសស្វាគមន៍ពលរដ្ឋខ្មែរទាំងអស់ឲ្យតែត្រឡប់មកវិញ ដោយមានមណ្ឌលសំចតនៅព្រំដែនកម្ពុជា ដើម្បីដឹកជញ្ជូនពួកគាត់ទៅកាន់ស្រុកកំណើតរៀងៗខ្លួន៕