លោក អ៊ុ រាត្រី បានអះអាងថា ច្រកទ្វារអន្ដរជាតិប៉ោយប៉ែត ច្រកទ្វារអន្តរជាតិស្ទឹងបត់ ច្រកទ្វារតំបន់បឹងត្រកួន និងច្រកទ្វារម៉ាឡៃ នៅបន្ដបើកដំណើរការធម្មតាទេនៅថ្ងៃនេះ។

ប៉ុន្ដែក្នុងនោះលោកបញ្ជាក់ថា ច្រកទ្វារតំបន់ម៉ាឡៃវាខុសប្លែកបន្តិច ត្រង់ថាយោធាថៃអនុញ្ញាតឱ្យតែមនុស្សចេញចូលប៉ុណ្ណោះ សម្រាប់រទេះនិងរថយន្ដ ត្រូវផ្អាកមិនអនុញ្ញាតឱ្យចេញចូលជាបណ្ដោះអាសន្ន។

សូមបញ្ជាក់ថាយោងតាមការជូនដំណឹងពីលោក គឹម សុវណ្ណា អគ្គកុងស៊ុលកម្ពុជាប្រចាំខេត្តស្រះកែវបានឱ្យដឹងថា យោធាថៃដែលប្រចាំការនៅតំបន់ព្រំដែនខេត្តស្រះកែវ ចាប់ពីថ្ងៃទី៧ ខែមិថុនា ឆ្នាំ២០២៥ តទៅនិងមានការបិទដោយឯកតោភាគីនូវច្រកតំបន់និងច្រករបៀង រវាងព្រំដែនថៃ-កម្ពុជាដើម្បីរង់ចាំការចចារពាក់ព័ន្ធករណីជម្លោះវិវាទព្រំដែន។

ក្នុងនោះលោក គឹម សុវណ្ណា បញ្ជាក់បន្ថែមថា ការបិទបណ្ដោះអាសន្ននោះធ្វើឡើងបន្ទាប់ពីភាគីកម្ពុជាទាមទារឱ្យភាគីថៃចូលខ្លួនដោះស្រាយនៅតុលាការយុត្តិធម៌អន្តរជាតិICJ និងបដិសេធមិនព្រមចរចារ៤ចំណុច គឺតំបន់ប្រាសាទតាមាន់តូច តាមាន់ធំ តាក្របី និងតំបន់មុំបីនៅក្នុងកិច្ចប្រជុំពេញអង្គគណៈកម្មាធិការចម្រុះព្រំដែន(JBC) ដែលនឹងប្រព្រឹត្តទៅនៅថ្ងៃទី១៤ ខែមិថុនា ឆ្នាំ ២០២៥ខាងមុខនេះ។