លោករដ្ឋមន្ត្រី កែវ រតនៈ បានព្រមានទៅដល់ម្ចាស់ស្ថានីយប្រេងឥន្ទនៈទាំងឡាយណា ដែលមិនគោរពតាមលក្ខខណ្ឌក្នុងអាជ្ញាបណ្ណ និងលក់ឡើងថ្លៃ លើសពីការកំណត់របស់រាជរដ្ឋាភិបាល បានកំណត់ជាទូទៅ ក្រសួងរ៉ែនិងថាមពល និងដកអាជ្ញាបណ្ណឈប់ឱ្យលក់ប្រេងមួយជីវិត និងប្រឈមនឹង ការពិន័យជាអន្តរកាលផ្សេងៗទៀត ។

ការចេញមកព្រមានរបស់លោក កែវ រតនៈ រដ្ឋមន្ត្រីក្រសួងរ៉ែ និងថាមពល ធ្វើឡើងក្នុងឱកាសអញ្ជើញ សម្ពោធ ដាក់ឱ្យប្រើប្រាស់ជាផ្លូវការ អគារសិក្សាថ្មីមួយខ្នង និងបរិក្ខារនានា នៅក្នុងសាលាបឋមសិក្សា ពោធិ៍សាត់ ស្ថិតនៅឃុំផ្ទះព្រៃ ក្រុងពោធិ៍សាត់ ខណៈដែលសង្គ្រាមមជ្ឈិមបូព៌ា បាននិងកំពុង បង្កឱ្យតម្លៃប្រេងឥន្ទនៈលើពិភពលោក មានការហក់ឡើង ។

ថ្លែងក្នុងឱកាសនេះ លោក កែវ រតនៈ បានអំពាវនាវ ឱ្យពលរដ្ឋ កុំមានការភ័យស្លន់ស្លោ ជ្រួលច្របល់ ទៅដណ្តើមទិញស្តុកទុកប្រេងឥន្ទនៈ នៅតាមគេហដ្ឋានរៀងៗខ្លួន ដែលនាំឱ្យមានគ្រោះអគ្គិភ័យ និង គ្រោះថ្នាក់ណាមួយកើតឡើងជាយថាហេតុ ។

ក្នុងនោះ លោក កែវ រតនៈ ថ្លែងថា សូមបញ្ជូនសារ ទៅបងប្អូនដែលជាអ្នក ប្រកបអាជីវកម្ម ធ្វើការ៉ាសសាំង (ស្ថានីយប្រេងឥន្ទនៈ) ពេលដែលបងប្អូនទៅធ្វើការរាសសាំង បងប្អូនបានសុំការអនុញ្ញាត បានសុំអាជ្ញាបណ្ណពីក្រសួង ប្រសិនបើបងប្អូនមិនគោរពតាមលក្ខខណ្ឌរបស់ អាជ្ញាបណ្ណ និងអនុវត្តតាមការដាក់កំណត់របស់រដ្ឋាភិបាល ដែលជាអ្នកឱ្យអាជ្ញាបណ្ណ ក្រសួងរ៉ែ និង ថាមពល នឹងដកអាជ្ញាបណ្ណ ឈប់ឱ្យលក់ប្រេងមួយជីវិត" ។

បន្ថែមលើនេះលោកបានអំពាវនាវ ឱ្យម្ចាស់អាជីវកម្មស្ថានីយប្រេងឥន្ទនៈ ខិតខំរក្សាអាជ្ញា បណ្ណ របស់ខ្លួន ដែលជាតម្លៃមួយ ដែលពិបាកនឹងស្នើសុំ និងទទួលបាន ជាពិសេសអំពាវនាវ ឱ្យចូលរួម ទាំងអស់គ្នា គោរពតាមការកំណត់របស់រាជរដ្ឋាភិបាលផងដែរ៕