ក្រុមសាច់ញាតិបានប្រាប់សារព័ត៌មាន Cam Post នៅថ្ងៃចន្ទនេះថា គិតត្រឹមថ្ងៃនេះមានរយៈពេល៨ថ្ងៃហើយដែលពួកគាត់មិនទាន់ទទួលយុត្តិធម៌ បន្ទាប់ពីអ្នកមានឥទ្ធិពល ម្នាក់ បានបើកឡានកៀរបងស្រីរបស់គាត់ស្លាប់ កាលពីព្រឹក ថ្ងៃទី១៦ ខែកុម្ភៈ ឆ្នាំ២០២៦ នៅភូមិកម្មករ សង្កាត់ស្វាយប៉ោ ក្រុមបាត់ដំបង ខេត្តបាត់ដំបង ខណៈកំពុងជិះម៉ូតូអេបចិញ្ចើមផ្លូវស្ដាំដៃ ចំថ្ងៃសែនចូលឆ្នាំចិន ។

បើតាមសាក្សីថា ជនបង្ករគឺ ជាអ្នកមានឥទ្ធិពល ឬមានលុយគួរសម ដែលគេដឹងថា ឈ្មោះ ឆៃលី ។ ប៉ុន្តែត្រូវបានភាគីចូលខ្លួនទៅដោះស្រាយបដិសេធ បើទោះមានសាក្សីអះអាង និងកាមរ៉ាសុវត្ថិភាពក៍ដោយ ។ សារព័ត៌មាន Cam Post មិនអាចទំនាក់ទំនង សុំការពន្យល់ពីលោក ហេង ឆៃលី ដែលគេសង្ស័យថា ជាអ្នកបង្ករគ្រោះថ្នាក់ចរាចរបណ្ដាលឱ្យមនុស្សស្លាប់បានទេ ។

ប្រធានការិយាល័យចរាចរផ្លូវគោក នៃស្នងការដ្ឋាននគរបាលខេត្តបាត់ដំបង លោក ចាន់ សុធី នៅព្រឹកថ្ងៃទី២៣ កុម្ភៈនេះ បានបញ្ជាក់ថា រហូតមកទល់ពេលនេះភាគីទាំងពីរបានជួបចរចា តែលទ្ធផលបែបណា មិនទាន់ដឹងទេ ។ ប្រាប់សារព័ត៌មាន Cam Post លោក ចាន់ សុធី បានសង្កត់ធ្ងន់ថា យើងត្រូវការស្រាវជ្រាវ ប្រសិនបដិសេធ ។ យើងស្នើសុំគោលការទៅថ្នាក់លើ អនុវត្តតាមច្បាប់ «និតិវិធីត្រូវតែអ៊ីចឹង» អាចចេញដីកាឱ្យចូលខ្លួន ប្រសិនភាគីបង្ករមិនចូលដោះស្រាយតាមច្បាប់ ។

ទោះជាបែបណាករណីនេះ សាចញាតិជនរងគ្រោះបានដាក់ពាក្យបណ្ដឹងនៅកន្លែងប៉ូលិស និងស្នើសុំយ៉ាងទទួលពីថ្នាក់ដឹកនាំដើម្បីទទួលបានទួលយុត្តិធម៌ ៕