ក្នុងជំនួបសម្តែងការគួរសម និងពិភាក្សាការងារជាមួយលោក ហួត ស៊ីនាដ រដ្ឋលេខាធិការ ក្រសួងការងារ និងបណ្តុះបណ្តាលវិជ្ជាជីវៈ និងកាលពីថ្ងៃទី២៨ ខែមករា ឆ្នាំ២០២៦ នាទីស្ដីការក្រសួង ដើម្បីពង្រឹងកិច្ចសហការលើផ្នែកបណ្តុះបណ្តាល និងការអនុវត្តបទប្បញ្ញត្តិការងារ ដោយក្នុងជំនួបនោះ ភាគីទាំងពីរបានជជែកយ៉ាងលម្អិតអំពីការរៀបចំទិដ្ឋាការសម្រាប់បុគ្គលិកអប់រំជនជាតិជប៉ុន និងនីតិវិធីនៃការស្នើសុំប្រើប្រាស់កម្លាំងពលកម្មបរទេសឱ្យស្របតាមច្បាប់នៅកម្ពុជា លោក សាសាហារ៉ា កេនជិ (SASAHARA Kenji) នាយកសាលាអន្តរជាតិជប៉ុន CIESF Leaders Academy (CLA) បានថ្លែងអំណរគុណយ៉ាងជ្រាលជ្រៅចំពោះការគាំទ្ររបស់ក្រសួងការងារ និងបណ្តុះបណ្តាលវិជ្ជាជីវៈនាពេលកន្លងមក។ 

លោកប្តេជ្ញាចិត្តថានឹងបន្តពង្រឹងគុណភាពអប់រំតាមស្តង់ដាជប៉ុន ដើម្បីបណ្តុះបណ្តាលសិស្សានុសិស្ស ក៏ដូចជាយុវជនខ្មែរឱ្យមានចំណេះដឹង និងសមត្ថភាពខ្ពស់ សម្រាប់ឆ្លើយតបទៅនឹងតម្រូវការទីផ្សារការងារនាពេលបច្ចុប្បន្ន និងអនាគត។

ក្នុងឱកាសនោះ លោករដ្ឋលេខាធិការ បានថ្លែងបញ្ជាក់ថា ក្រសួងត្រៀមខ្លួនជានិច្ចក្នុងការសម្របសម្រួលបែបបទរដ្ឋបាលនានាដល់សាលា ប៉ុន្តែក្នុងនោះសាលាត្រូវធានាឱ្យបាននូវការអនុវត្តច្បាប់ស្តីពីការងារ និងរបបសន្តិសុខសង្គមឱ្យបានពេញលេញ ជាពិសេស ក្រសួងបានលើកទឹកចិត្តឱ្យសាលាផ្តល់អាទិភាពខ្ពស់ដល់ការជ្រើសរើសបុគ្គលិកជំនាញជានិយោជិតខ្មែរ មុននឹងសម្រេចចិត្តជ្រើសរើសបុគ្គលិកបរទេស៕

 

 

សូមបញ្ជាក់ថា សាលាអន្តរជាតិជប៉ុន CIESF Leaders Academy (CLA) បានចាប់ផ្ដើមបេសកកម្មអប់រំរបស់ខ្លួននៅកម្ពុជាតាំងពីឆ្នាំ២០១៦ ក្នុងនាមជាសាលាអង្គការ (NGO)។ ដោយមើលឃើញពីតម្រូវការអប់រំតាមស្តង់ដាអន្តរជាតិ នៅចុងឆ្នាំ២០២៥ សាលាបានវិវត្តខ្លួនទៅជាសាលាអន្តរជាតិពេញលក្ខណៈ ក្រោមការគាំទ្រយ៉ាងពេញទំហឹងពីក្រសួងអប់រំ យុវជន និងកីឡា និងស្ថានទូតជប៉ុនដើម្បីរួមចំណែកបណ្ដុះបណ្ដាលយុវជនឱ្យមានសមត្ថភាព និងការយល់ដឹងពីពហុវប្បធម៌សម្រាប់ជួយអភិវឌ្ឍសង្គមទៅថ្ងៃអនាគត៕