មហាសន្និបាតលើកទី១៤ បានបញ្ជាក់យ៉ាងច្បាស់ពីសង្គតភាព និងស្ថិរភាពក្នុងមាគ៌ាដឹកនាំរបស់វៀតណាម តាមរយៈការរៀបចំការផ្ទេរថ្នាក់ដឹកនាំជំនាន់ថ្មី ដែលមានថាមពល បទពិសោធន៍ និងចំណេះដឹងជ្រាលជ្រៅអំពីសេដ្ឋកិច្ច និងស្ថានភាពសកល។ ជាមួយគ្នានេះ មហាសន្និបាតបានអនុម័តឯកសារយុទ្ធសាស្ត្រសំខាន់ៗ សម្រាប់ដំណាក់កាលអភិវឌ្ឍន៍ឆ្នាំ២០២៦–២០៣០ និងចក្ខុវិស័យដល់ឆ្នាំ២០៤៥ ដោយផ្តោតលើការផ្លាស់ប្តូរឌីជីថល សេដ្ឋកិច្ចបៃតង ការច្នៃប្រឌិត និងការពង្រឹងកម្លាំងផ្ទៃក្នុង ដើម្បីឆ្លើយតបទៅនឹងការប្រែប្រួលមិនអាចទាយទុកជាមុនបាននៃសេដ្ឋកិច្ចពិភពលោក។

ស្ថិរភាពនយោបាយ និងសន្ទុះកំណើនសេដ្ឋកិច្ចរបស់វៀតណាម ក្រោយមហាសន្និបាត ត្រូវបានអ្នកវិភាគចាត់ទុកថា ជា “យុថ្កា” សម្រាប់ស្ថិរភាពសេដ្ឋកិច្ចនៃអនុតំបន់ទាំងមូល។ សម្រាប់កម្ពុជា នេះជាសញ្ញាវិជ្ជមានដ៏សំខាន់ ដែលបង្ហាញថា វៀតណាមនៅតែជាដៃគូជិតខាងមានភាពទំនុកចិត្ត និងអាចពឹងផ្អែកបាន ក្នុងការពង្រីកកិច្ចសហប្រតិបត្តិការរយៈពេលវែង។ ក្នុងវិស័យសេដ្ឋកិច្ច ឯកសារមហាសន្និបាតលើកទី១៤ បានបង្ហាញពីការផ្លាស់ប្តូរផ្នត់គំនិតថ្មី ក្នុងកិច្ចការបរទេសសេដ្ឋកិច្ចរបស់វៀតណាម។ មិនត្រឹមតែផ្តោតលើការដោះដូរពាណិជ្ជកម្មធម្មតាទៀតទេ ប៉ុន្តែវៀតណាមកំពុងឆ្ពោះទៅកាន់ការកសាង “ប្រព័ន្ធអេកូឡូស៊ីសេដ្ឋកិច្ចប្រទេសជិតខាង” ប្រកបដោយចីរភាព ដោយលើកទឹកចិត្តការបំពេញបន្ថែមគ្នា ជំនួសការប្រកួតប្រជែងដោយផ្ទាល់។ ការអភិវឌ្ឍហេដ្ឋារចនាសម្ព័ន្ធ ត្រូវបានកំណត់ជាគន្លឹះយុទ្ធសាស្ត្រសំខាន់។ វៀតណាមមានគោលនយោបាយជំរុញការសាងសង់ខ្សែផ្លូវល្បឿនលឿន ខាងជើង–ខាងត្បូង និងខ្សែផ្លូវតភ្ជាប់ទៅកាន់ប្រទេសឡាវ និងកម្ពុជា។ ជាពិសេស គម្រោងការសាងសង់ខ្សែផ្លូវល្បឿនលឿន ម៉ុកបៃ (Moc Bai) - ទីក្រុងហូជីមិញ ដែលតភ្ជាប់ជាមួយផ្លូវល្បឿនលឿន ភ្នំពេញ-បាវិត របស់កម្ពុជា ត្រូវបានរំពឹងថា នឹងក្លាយជា"របៀងសេដ្ឋកិច្ច" ឆ្លងកាត់ព្រំដែនដ៏សំខាន់ ជួយកាត់បន្ថយពេលវេលា និងថ្លៃដើមដឹកជញ្ជូន ហើយអនុញ្ញាតឱ្យទំនិញពីកម្ពុជាចូលទៅកាន់ប្រព័ន្ធកំពង់ផែសមុទ្រទឹកជ្រៅរបស់វៀតណាមដោយផ្ទាល់ ដើម្បីនាំចេញទៅកាន់ទីផ្សារពិភពលោកកាន់តែងាយស្រួល។ ទន្ទឹមនឹងនោះ វៀតណាមលើកទឹកចិត្តការកសាងខ្សែសង្វាក់ផ្គត់ផ្គង់ផលិតកម្មរួម ដោយអភិវឌ្ឍតំបន់សេដ្ឋកិច្ចព្រំដែនឱ្យក្លាយជាមជ្ឈមណ្ឌលកែច្នៃកសិផល រុក្ខាផល និងជលផល។ កសិផលសំខាន់ៗរបស់កម្ពុជា ដូចជា ស្រូវអង្ករ កៅស៊ូ និងគ្រាប់ស្វាយចន្ទី នឹងមានឱកាសមិនត្រឹមតែលក់ជាវត្ថុធាតុដើមទេ ប៉ុន្តែថែមទាំងចូលរួមក្នុងខ្សែសង្វាក់តម្លៃសកល តាមរយៈការកែច្នៃទំនើបនៅតាមតំបន់ព្រំដែន។ មហាសន្និបាតលើកទី១៤ សេដ្ឋកិច្ចឌីជីថល ក៏ត្រូវបានកំណត់ជាកម្លាំងចលករកំណើនសំខាន់បំផុតមួយ។ វៀតណាមមានផែនការគាំទ្រ និងសហការជាមួយប្រទេសជិតខាង ក្នុងការផ្លាស់ប្តូរឌីជីថល ដែលនឹងបើកឱកាសឱ្យសហគ្រាសកម្ពុជា ប្រើប្រាស់ប្រព័ន្ធពាណិជ្ជកម្មអេឡិចត្រូនិក ការទូទាត់ឌីជីថល និងដំណោះស្រាយបច្ចេកវិទ្យាពីក្រុមហ៊ុនវៀតណាមធំៗ ដូចជា Viettel និង VNPT ជាដើម។ ដោយផ្អែកលើគោលការណ៍ និងសេចក្តីសម្រេចចិត្តស្តីពីកិច្ចសហប្រតិបត្តិការសេដ្ឋកិច្ចក្នុងឯកសារមហាសន្និបាតលើកទី១៤ អនាគតសេដ្ឋកិច្ចរួមរវាងវៀតណាម និងកម្ពុជា ត្រូវបានវាយតម្លៃថាមានទិសដៅវិជ្ជមាន និងរុងរឿង។ ក្រោយមហាសន្និបាតនេះ ពាណិជ្ជកម្មទ្វេភាគីនឹងផ្លាស់ប្តូរពីការរីកចម្រើនតាមបរិមាណ ទៅរកការរីកចម្រើនតាមគុណភាព ដោយពង្រីកពីកសិផល និងទំនិញប្រើប្រាស់ ទៅកាន់ទំនិញឧស្សាហកម្ម គ្រឿងចក្រ និងផលិតផលបច្ចេកវិទ្យាជាន់ខ្ពស់។ ជាមួយគោលដៅក្លាយជា “រោងចក្រនៃពិភពលោក” វៀតណាមត្រូវការទីផ្សារជិតខាងមានស្ថិរភាពដូចជាកម្ពុជា ខណៈគោលដៅទំហំពាណិជ្ជកម្ម ២០ ពាន់លានដុល្លារ កំពុងក្លាយជាការពិតជាក់ស្តែង។ ជាមួយនឹងគោលនយោបាយលើកទឹកចិត្តការវិនិយោគទៅក្រៅប្រទេស ក្នុងវិស័យប្រកបដោយចីរភាព សហគ្រាសវៀតណាម នឹងនាំមកនូវបច្ចេកវិទ្យាទំនើបៗ ក្នុងវិស័យកសិកម្មស្អាត ថាមពលកកើតឡើងវិញ ដូចជា ថាមពលពន្លឺព្រះអាទិត្យ និងថាមពលខ្យល់ ព្រមទាំងការអភិវឌ្ឍអចលនទ្រព្យឧស្សាហកម្មនៅកម្ពុជា។ ក្នុងដំណើរនេះ វត្តមានរបស់ធនាគារវៀតណាមនៅកម្ពុជា ដូចជា BIDC, MB និង Sacombank នឹងបន្តធ្វើជាគ្រឹះស្ថានហិរញ្ញវត្ថុដ៏សំខាន់ សម្រាប់គាំទ្រគម្រោងវិនិយោគទាំងនេះ។ កិច្ចសហប្រតិបត្តិការលើវិស័យថាមពល និងសន្តិសុខស្បៀង នឹងក្លាយជាសសរស្តម្ភមួយក្នុងកិច្ចសហប្រតិបត្តិការសេដ្ឋកិច្ចរវាងប្រទេសទាំងពីរ។ ក្នុងបរិបទពិភពលោកដែលពោរពេញដោយការប្រែប្រួល វៀតណាម និងកម្ពុជារួមគ្នាបង្កើតបណ្តាញសន្តិសុខថាមពល និងស្បៀងអាហារក្នុងតំបន់ គឺជាជំហានយុទ្ធសាស្ត្រដ៏សំខាន់មួយ។

វៀតណាមមានអត្ថប្រយោជន៍លើបច្ចេកទេសបង្កើនផល និងការកែច្នៃ ខណៈដែលកម្ពុជាមានសក្តានុពលធំធេងលើដីធ្លី និងការអភិវឌ្ឍកសិកម្ម។ ការរួមបញ្ចូលគ្នានេះ នឹងក្លាយជា "កន្ត្រកស្បៀង" របស់ពិភពលោក។ ចំពោះវិស័យថាមពល ការតភ្ជាប់បណ្តាញអគ្គិសនី និងកិច្ចសហប្រតិបត្តិការអភិវឌ្ឍន៍ថាមពលស្អាតតាមបណ្តោយព្រំដែន នឹងជួយកាត់បន្ថយថ្លៃដើមផលិតកម្ម និងបង្កើនសមត្ថភាពប្រកួតប្រជែង និងលើកកម្ពស់ការអភិវឌ្ឍឧស្សាហកម្មរបស់ប្រទេសទាំងពីរ។ ក្នុងវិស័យទេសចរណ៍ មហាសន្និបាតលើកទី១៤ បានសង្កត់ធ្ងន់លើការអភិវឌ្ឍវិស័យនេះ ឱ្យក្លាយជាវិស័យសេដ្ឋកិច្ចមុខព្រួញ ដោយផ្តោតលើចីរភាព។ នេះបានបើកឱកាសសម្រាប់វៀតណាម និងកម្ពុជា ក្នុងការអនុវត្តគំនិត “ប្រទេសពីរ គោលដៅតែមួយ” តាមរយៈការតភ្ជាប់ដំណើរកម្សាន្តពីបណ្តាក្រុងធំៗរបស់វៀតណាម ទៅកាន់ខេត្តសៀមរាប រាជធានីភ្នំពេញ និងតំបន់ឆ្នេររបស់កម្ពុជា។ ការតភ្ជាប់នេះ នឹងជួយបង្កើតប្រព័ន្ធអេកូឡូស៊ីទេសចរណ៍ដ៏សំបូរបែប និងទាក់ទាញភ្ញៀវទេសចរដែលមានកម្រិតចំណាយខ្ពស់ ពីអឺរ៉ុប អាមេរិក និងអាស៊ីឦសាន។ ភាពជោគជ័យនៃមហាសន្និបាតលើកទី១៤ ជាសារយ៉ាងច្បាស់ថា វៀតណាមមានបំណងឈានទៅមុខរួមជាមួយប្រទេសជិតខាង។

សម្រាប់កម្ពុជា នេះគឺជាឱកាសដ៏មានតម្លៃ ក្នុងការទាញយកអត្ថប្រយោជន៍ពីសន្ទុះកំណើន ការចែករំលែកបច្ចេកវិទ្យា និងទីផ្សារដ៏ទូលំទូលាយ។ ទំនាក់ទំនងសេដ្ឋកិច្ចវៀតណាម–កម្ពុជា កំពុងឆ្ពោះទៅរកការអភិវឌ្ឍផ្អែកលើការយោគយល់ ការគោរព និងផលប្រយោជន៍ទៅវិញទៅមក ដើម្បីបង្កើតភាពរុងរឿង និងសុភមង្គលរួមសម្រាប់ប្រជាជននៃប្រទេសទាំងពីរ៕