យោងតាមសារលិខិតរបស់សម្តេចតេជោ ហ៊ុន សែន ប្រធានព្រឹទ្ធសភា ផ្ញើជូនសម្តេចក្រឡាហោម ស ខេង ឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា ក្នុងពិធីចម្រើនជន្មាយុ សម្តេចតេជោបន្តថា ក្នុងកាលៈទេសៈនៃការឈ្លានពានរបស់កងទ័ពថៃ មកលើអធិបតេយ្យភាពជាតិកម្ពុជា សម្តេច ស ខេង និងលោកជំទាវ បានចូលរួមជាកម្លាំងមហាសាមគ្គីជាតិដ៏ស្អិតរមួតវេញជាធ្លុងមួយ រួមនឹងវីរកងទ័ព វីរនគរបាល ប្រកៀកស្មាគ្នា គាំទ្រដោយជឿជាក់យ៉ាងមុតមាំលើយុទ្ធសាស្រ្តការពារជាតិរបស់រាជរដ្ឋាភិបាលកម្ពុជា និងទឹកចិត្តស្នេហាជាតិនិងស្មារតីមោះមុតរបស់វីរយុទ្ធជនការពារព្រំដែន ក្នុងបុព្វហេតុការពារជាតិមាតុភូមិ។

ជាមួយគ្នានេះ សម្តេចតេជោ កោតសរសើរខ្ពស់ចំពោះ សម្តេច ស ខេង ដែលជាថ្នាក់ដឹកនាំដ៏ឆ្នើម ដែលបានលះបង់អស់កម្លាំងកាយចិត្ត ប្រាជ្ញាស្មារតី ប្រឹងប្រែងបំពេញបេសកកម្ម នៅតាមបណ្តារាជធានី ខេត្ត ដើម្បីស្វែងយល់ពីវឌ្ឍនភាព បញ្ហាប្រឈមនៅមូលដ្ឋានផ្ទាល់ ។

ក្នុងនោះ សម្តេច ស ខេង ក៏បានព្យាយាមដោះស្រាយការលំបាករបស់ប្រជាពលរដ្ឋ ក្នុងបុព្វហេតុ ជាតិ សាសនា ព្រះមហាក្សត្រ និងសម្រាប់ប្រជាជនខ្មែរបានរស់នៅរួមគ្នាយ៉ាងសុខដុមរមនាក្រោមម្លប់សន្តិភាព ហើយដើម្បីសម្រេចបាននូវចក្ខុវិស័យកម្ពុជាឆ្នាំ២០៣០ និងឆ្នាំ២០៥០ ៕