|
ក្រុមអ្នកសង្កេតការណ៍អន្តរកាល បានចុះទៅដល់ច្រកបឹងត្រកួន
ថ្ងៃទី ៖ 15-09-2025, ដោយ Dara007 , 18 Views
ភ្នំពេញៈ អ្នកនាំពាក្យក្រសួងការពារជាតិ បានឲ្យដឹងថា នៅព្រឹកថ្ងៃទី១៥ ខែកញ្ញា ឆ្នាំ២០២៥នេះ ក្រសួងការពារជាតិ បានសម្របសម្រួលជូនក្រុមអ្នកសង្កេតការណ៍អន្តរកាល (IOT) ដឹកនាំដោយ វរសេនីយ៍ឯក Mohd Farid Bin Mohd Yusop ប្រធានក្រុមអ្នកសង្កេតការណ៍អន្តរកាល ទីស្នាក់ការ២ ប្រចាំខេត្តបន្ទាយមានជ័យ អញ្ជើញចុះពិនិត្យទីតាំងជាក់ស្តែង នៅច្រកបឹងត្រកួន ខេត្តបន្ទាយមានជ័យ ។
លោកស្រីឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ នៃព្រះរាជាណាចក្រកម្ពុជា បានថ្លែងថា ការចុះដល់ច្រកបឹងត្រកួនរបស់អ្នកសង្កេតការណ៍មកពីបណ្តាប្រទេសអាស៊ាននេះ ដើម្បីសង្កេតការណ៍ ផ្ទៀងផ្ទាត់ និងរាយការណ៍ក្រោយបទឈប់បាញ់ចូលជាធរមានកាលពីថ្ងៃទី២៨ ខែកក្កដា ឆ្នាំ២០២៥ ។
ការចុះទៅរបស់ក្រុមអ្នកសង្កេតការណ៍នេះ ក៏ធ្វើឡើងបន្ទាប់ពីការចុះពិនិត្យទីតាំងជាក់ស្តែង នៅភូមិជោគជ័យ ខេត្តបន្ទាយមានជ័យ និងនៅច្រកព្រំដែនអានសេះ ខេត្តព្រះវិហារ កាលពីព្រឹកថ្ងៃទី១៣ ខែកញ្ញា ឆ្នាំ២០២៥។ ជាមួយនឹងការចុះទៅដល់របស់ក្រុមអ្នកសង្កេតការណ៍អន្តរកាលនេះ គឺក្រសួងការពារជាតិកម្ពុជាក្នុងនាមជាសេនាធិការរបស់រាជរដ្ឋាភិបាល បានបញ្ជាក់សាជាថ្មីនូវការប្តេជ្ញាចិត្តយ៉ាងម៉ឺងម៉ាត់ នៅក្នុងការគោរពបទឈប់បាញ់ដែលភាគីកម្ពុជា -ថៃ បានឯកភាពគ្នានៅក្នុងកិច្ចប្រជុំគណៈកម្មាធិការព្រំដែនទូទៅកម្ពុជា-ថៃ (GBC) កាលពីថ្ងៃទី២៨ ខែកក្កដា ឆ្នាំ២០២៥ នៅទីក្រុងពូត្រាចាយ៉ា ក៏ដូចជាការអនុវត្តឲ្យបានពេញលេញ និងប្រកបដោយប្រសិទ្ធភាពនូវរាល់ការព្រមព្រៀងទាំងឡាយដែលភាគីទាំងពីរសម្រេចបានមកទល់ពេលនេះ៕
|