ថ្លែងក្នុងឱកាសអញ្ជើញជាអធិបតីដ៏ខ្ពង់ខ្ពស់ក្នុងពិធីសំណេះសំណាលជាមួយមន្ត្រីរាជការ បុគ្គលិក កម្មករនិយោជិត កំពង់ផែស្វយ័តក្រុងព្រះសីហនុ នាឱកាសអបអរសាទរខួបអនុស្សាវរីយ៍ លើកទី១៣៩ នៃទិវាពលកម្មអន្តរជាតិ ១ ឧសភា នៅទីតាំងកំពង់ផែស្វយ័តក្រុងព្រះសីហនុ នៅព្រឹកថ្ងៃទី០១ ខែ ឧសភា ឆ្នាំ២០២៥នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ទៅកាន់មិត្តជប៉ុនថា សូមកុំភ័យរាជរដ្ឋាភិបាលកម្ពុជា គឺនៅតែបន្តធ្វើការជាមួយជប៉ុនជានិច្ច ពីព្រោះកម្ពុជាបានចាប់ផ្ដើមជាមួយមិត្តជប៉ុន តាំងពីកវែកកឆ្នាំងមកម្ល៉េះ។

សម្ដេចធិបតីបានបញ្ជាក់ថា កំពង់ផែកម្ពុជា នឹងបន្តសហការជាមួយជប៉ុនជាដៃគូយុទ្ធសាស្ត្រទ្វេភាគីលើកិច្ចសហប្រតិបត្តិការកំពង់ផែ។ សម្ដេចធិបតីថ្លែថា សូមមិត្តជប៉ុនឈប់មានការភ័យព្រួយថា កម្ពុជាលែងជ្រើសរើសជប៉ុនជាដៃគូសហការលើប្រតិបត្តិការកំពង់ផែជាមួយជប៉ុននោះអី។ ជប៉ុននៅតែជាដៃគូទ្វេភាគីលើកិច្ចសហការក្នុងវិស័យកំពង់ផែជាមួយកម្ពុជាជាដដែល និងបន្តទៅមុខទៀត។

សម្ដេចធិបតីបានថ្លែងអំណរគុណចំពោះប្រទេសជប៉ុន ដែលបានជួយលើការអភិវឌ្ឍកំពង់ផែនៅកម្ពុជា ពិសេសកំពង់ផែព្រះសីហនុ៕