សម្តេចធិបតី បានណែនាំឱ្យក្រសួងកសិកម្ម ពាណិជ្ជកម្ម ឧស្សហកម្ម សិក្សាជំរុញការផលិតផលិតផលក្នុង ដើម្បីលើកទឹកចិត្ដខ្សែចង្វាក់ណាខ្លះអាចយកទៅធ្វើសិប្បកម្មផលិតឧទារណ៍សម្ភារៈផ្ទះបាយ ចាន ស្លាបព្រារ ជ័រ ក្រដាស ដើមឬស្សីមួយចំនួនដែលធ្វើជាផលិតផលក្នុងស្រុក ដែលយកក្រុមហ៊ុនសំបកកង់ឡានធ្វើជាគំរូរ។

សំឡេង៖«សម្តេចធិបតី មានប្រសាសន៍ថា អំឡុងពេលដែលកម្ពុជាមានបញ្ហាព្រំដែនជាមួយប្រទេសថៃ សម្ដេចបានជំរុញឱ្យពិនិត្យមើលឧស្សាហកម្មយុទ្ធសាស្រ្ដ ការវិនិយោគលើឧស្សាហកម្មយុទ្ធសាស្រ្ដ ដើម្បីបង្កើនផលិតផលក្នុងស្រុក ពង្រីកលទ្ធភាពក្នុងស្រុក ចាប់យកឱកាសក្នុងពេលពលរដ្ឋគាំទ្រផលិតផលក្នុងស្រុក ដូច្នេះត្រូវមានចីរភាព។ ចីរភាពមានពីរ ទាំងផលិតផលដែលមានចីរភាព គុណភាព និងអ្នកទិញដែលមានចីរភាពផងដែរ។»

សម្ដេចធិបតី គូសបញ្ជាក់ថា អំឡុងបញ្ហាព្រំដែនកម្ពុជា ថៃ រាជរដ្ឋាភិបាលបានជំរុញការពង្រីកឧស្សាហកម្មយុទ្ធសាស្រ្ដសំខាន់ៗមួយចំនួននៅក្នុងស្រុកដូចជា ទឹកដោះគោ មី ស្ករស ជាដើម ដែលរដ្ឋដាក់គោលដៅកាត់បន្ថយការនាំចូលឈានទៅដល់កាត់បន្ថែយជាអតិបរិមាហើយពង្រីកផលិតផលក្នុងស្រុក។ សម្ដេចធិបតី បញ្ជាក់ថា ការជំរុញផលិតផលក្នុងស្រុកនេះ គឺជួយបង្កើតចំណូលជូនប្រជាពលរដ្ឋ និងជំរុញសេដ្ឋកិច្ចជាតិ តាមរយៈការផលិតវត្ថុធាតុដើមនៅក្នុងប្រទេស និងអាចនាំចេញទៅក្រៅប្រទេសផងដែរ។

ទន្ទឹមនឹងនេះ សម្ដេចធិបតី បានចាត់ទុកកំណើនការទិញលក់ផលិតផលកៅស៊ូនៅក្នុងស្រុកនេះ គឺជាគោលដៅនៃការអភិវឌ្ឍវិស័យកសិកម្មរបស់កម្ពុជា ខណៈការអភិវឌ្ឍវិស័យឧស្សាហកម្មនេះ ជំហានដំបូងកម្ពុជាផលិត និងនាំចេញវត្ថុធាតុដើម, បន្ទាប់មកការនាំចេញ និងផលិតនូវផលិតផលពាក់កណ្ដាលសម្រេច, និងចុងក្រោយ គឺការនាំចេញផលិតផលសម្រេចដែលជំរុញឱ្យកសិឧស្សាហកម្មនៅកម្ពុជា។ លទ្ធផលនេះ គឺជាគោលដៅសំខាន់នេះ ក្នុងការរក្សាបានតម្លៃសរុប និងតម្លៃបន្ថែមនៅក្នុងប្រទេស។

សម្ដេចធិបតី បន្ថែមថា គោលដៅក្នុងការបង្កើតសួនឧស្សាហកម្មនៅតាមបណ្ដាខេត្ត គឺដើម្បីរក្សាទីផ្សារដែលមានតម្លៃខ្ពស់ និងស្ថិរភាពឱ្យកសិករ ព្រោះបើយកខ្សែចង្វាក់ផលិតកម្ម និងអ្នកទិញមកដាក់នៅក្នុងស្រុក រាជរដ្ឋាភិបាលនឹងជួយអ្នកវិនិយោគនោះ តាមរយៈការឱ្យពន្ធទាប ដើម្បីមានលទ្ធភាពទៅទិញផលិតផលសិកម្មរបស់កសិករខ្មែរ ទិញឱ្យបានតម្លៃខ្ពស់ និងមានទីផ្សារថេរពីកសិករនៅក្នុងស្រុកនេះហើយជាអ្វីដែលរាជរដ្ឋាភិបាលកំពុងធ្វើ៕