ពីថ្ងៃទី១៨ ដល់ទី២៣ ខែធ្នូ ប្រេសិតពិសេសកិច្ចសម្រាប់កិច្ចការអាស៊ីនៃក្រសួងការបរទេសចិន Deng Xijun បានធ្វើដំណើរមកកម្ពុជា និងថៃ ដើម្បីជួយដោះស្រាយបញ្ហាប្រទេសទាំង២។ ក្នុងទស្សនកិច្ចនេះ លោក Deng បានជួបជាមួយនាយករដ្ឋមន្រ្តីប្រទេសទាំង២ និងមន្រ្តីជាន់ខ្ពស់ការទូត ក៏ដូចជាខាងយោធាដែរ។ នេះបើតាមការប្រកាសរបស់ក្រសួងការបរទេសចិននៅថ្ងៃទី២៣ ខែធ្នូ។ ក្រសួងការបរទេសចិនបញ្ជាក់ថា ប្រេសិតចិន បង្ហាញក្ដីបារម្ភជាខ្លាំងពីស្ថានភាពព្រំដែនកម្ពុជា និងថៃ ហើយសោកស្ដាយចំពោះការស្លាប់ និងការភៀសខ្លួនរបស់ប្រជាជន។ ចិនក៏ចូលរួមរំលែកទុក្ខផងដែរ។

អាទិភាពបន្ទាន់បំផុត គឺការសម្រេចឲ្យបានបទឈប់បាញ់ភ្លាមៗ បញ្ឈប់ការប្រយុទ្ធ និងការបន្តការសន្ទនាដើម្បីដោះស្រាយជម្លោះព្រំដែនតាមរយៈមធ្យោបាយសន្តិភាព។

លោក Deng និយាយបែបនេះ។ លើសពីនេះ ចិនគាំទ្រការប្រឹងប្រែងរបស់អាស៊ាន និងគាំទ្រតួនាទីសំខាន់របស់ក្រុមសង្កេតការណ៍អាស៊ានក្នុងការតាមដានបទឈប់បាញ់។

ក្រសួងការបទេសចិន លោក Deng ក៏ញ្ចាក់ថា ទីក្រុងប៉េកាំងក៏ត្រៀមខ្លួនជួយបង្កើតលក្ខខណ្ឌ និងផ្ដល់វេទិកាសម្រាប់ការសន្ទនា និងការចរចារវាងភាគីទាំង២។

ចិនក៏សង្ឃឹមថា កម្ពុជា និងថៃ នឹងខិតជិតគ្នា ស្ដារទំនុកចិត្ត និងកសាងព្រំដែនសន្តិភាព។ ក្នុងសេចក្ដីប្រកាសដដែល មេដឹកនាំកម្ពុជា និងថៃ បានសាទរការប្រឹងប្រែងរបស់ចិនក្នុងការជំរុញសន្តិភាព និងការចរចាដែលអាចទទួលយកបានសម្រាប់ភាគីទាំងអស់។ ប្រទេសទាំង២ ក៏បញ្ជាក់ជាថ្មីលើការប្ដេជ្ញាចិត្តចំពោះសន្តិភាព ហើយសង្ឃឹមថា អាចសម្រេចបានបទឈប់បាញ់មានចីរភាព។

ក្រសួងការបរទេសចិន បន្តទៀតថា កម្ពុជា និងថៃ ក៏មានឆន្ទៈរក្សាទំនាក់ទំនងជាមួយចិន សំដៅបន្ធូរភាពតានតឹង និងស្ដារសន្តិភាព ក៏ដូចជាស្ថិរភាពតាមព្រំដែនឲ្យបានឆាប់បំផុត៕