|
នាយករដ្ឋមន្រ្ដី ចង់ឃើញស្នាដៃកូនខ្មែរ ស្រាវជ្រាវ និងសរសេរចងក្រងជាសៀវភៅដាក់បញ្ជូលនៅក្នុងបណ្ណាល័យឱ្យបានច្រើន
ថ្ងៃទី ៖ 21-05-2025, ដោយ Dara007 , 57 Views
ភ្នំពេញៈ នាយករដ្ឋមន្រ្ដី ចង់ឃើញស្នាដៃកូនខ្មែរស្រាវជ្រាវ និងសរសេរចងក្រងជាសៀវភៅដាក់បញ្ជូលនៅក្នុងបណ្ណាល័យឱ្យបានច្រើន ដើម្បីលើកកម្ពស់ការអាន ដែលធ្វើឱ្យបញ្ញាខួក្បាលកាន់តែមានសមត្ថភាពខ្ពស់។
ការចង់ឃើញស្នាដៃកូនខ្មែររបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាធ្វើឡើងក្នុងឱកាសអញ្ជើញអធិបតីដ៏ខ្ពង់ខ្ពស់ក្នុងពិធីសម្ពោធសមិទ្ធផលកំណែទម្រង់វិទ្យាស្ថានជាតិអប់រំ និងពិធីប្រគល់ សញ្ញាបត្រជូនដល់និស្សិត និងគរុនិស្សិតចំនួន ២៧៥នាក់ នៅវិទ្យាស្ថានជាតិអប់រំ រាជធានីភ្នំពេញ នៅព្រឹកថ្ងៃទី២១ ខែឧសភា ឆ្នាំ២០២៥។
សម្តេចមហាបវរធិបតីបានលើកទឹកចិត្តដល់សាស្ដ្រាចារ្យ និងនិស្សិតខ្មែរទាំងក្នុង និងក្រៅប្រទេសដែលបានស្រាវជ្រាវឯកសារផ្សេងៗរួចហើយ ពីជំនាន់មួយទៅជំនាន់មួយ សុំយកតម្កល់ទុក នៅក្នុងបណ្ណាល័យ និងតាមសាកលវិទ្យាល័យផ្សេងៗ ដើម្បីទុកជាកេរដំណែលសម្រាប់និស្សិត និងអ្នកស្រាវជ្រាវជំនាន់ក្រោយបន្តបន្ទាប់ទៀត ដែលជារបកគំហើញរបស់កូនខ្មែរ។
សម្តេចមហាបវរធិបតីណែនាំដល់សិស្សកុំពឹងផ្អែកទៅលើឧបករណ៍ខ្លាំងពេកលើការសិក្សារៀនសូត្រ និងស្រាវជ្រាវ ដែលនាំឱ្យសិស្សបាត់បង់មូលដ្ឋានគ្រឹះក្នុងការសិក្សារៀនសូត្រ ខ្វះខាតការអាន និងសរសេរ ឈានទៅខ្សោយសមត្ថភាពនាពេលខាងមុខ។ ប៉ុន្ដែត្រូវបែរមកខិតខំសិក្សាស្រាវជ្រាវ អាន និងសរសេរ សង្ខេបដោយខ្លួនឯង ទើបអាចឱ្យមានចំណេះពិតប្រាកដ។
ជាមួយគ្នានេះ សម្តេចមហាបវរធិបតីក៏បង្ហាញការកោតសរសើរ ដែលសាលារៀនរៀបចំឱ្យមានការប្រកួត ប្រជែងតស៊ូមតិរបស់សិស្ស នៅតាមសាលារៀន ដែលធ្វើឱ្យសិស្សមានសមត្ថភាពក្នុងការស្រាវជ្រាវ និងការអានមានការកើនឡើង៕
|