|
អាជ្ញាធរមិនបានទំនេរដៃដោះស្រាយក្នុងការស្ដាប្រឡាយ
ថ្ងៃទី ៖ 23-10-2026, ដោយ Dara007 , 50 Views
ភ្នំពេញៈ អាជ្ញាធរមិនបានទំនេរដៃដោះស្រាយក្នុងការស្ដាប្រឡាយ ក្រោយស្ថានភាពទឹកលិចតាមផ្លូវមួយចំនួនក្នុងភូមិសាស្រ្តរាជធានីភ្នំពេញ មិនមានរយ:ពេលយូរថ្ងៃនោះឡើយ សម្រាប់ឆ្នាំនេះ បើប្រៀបជាមួយស្ថានភាពឆ្នាំមុន។ នៅប៉ុន្មានថ្ងៃមកនេះ ក្រោយភ្លៀងធ្លាក់ជាប់គ្នា បានបណ្តាលឲ្យទឹកជន់លិចតាមផ្លូវមួយចំនួន ដែលធ្វើឲ្យពលរដ្ឋពិបាកធ្វើដំណើរ។
ស្ថានភាពទឹកលិចផ្លូវទាំងនេះ ក៏មានពលរដ្ឋលើកឡើងពីកត្តាប្រឡាយមួយចំនួន ដែលមិនសូវបានស្តារ ជាហេតុនាំឲ្យរាំងស្ទះលំហូរទឹកដែលជន់លិចទាំងនេះផងដែរ។
លោកស្រី ដោ សម្ផស្ស អ្នកនាំពាក្យរដ្ឋបាលរាជធានីភ្នំពេញ នៅថ្ងៃទី២៣ ខែតុលា ឆ្នាំ២០២៦នេះ បានឆ្លើយតបថា ការងារស្តារប្រឡាយត្រូវបានរដ្ឋបាលរាជធានីភ្នំពេញសម្រុកធ្វើតាំងពីរដូវប្រាំងមកម្ល៉េះ បានជាច្រើនខ្សែជាបន្តបន្ទាប់ហើយ ដោយមានទាំងគម្រោងហិរញ្ញប្បទានរបស់រាជរដ្ឋាភិបាលតាមរយៈក្រសួងពាក់ព័ន្ធផងដែរ។
លោកស្រីបានបន្តថា ជាលទ្ធផលនៃគម្រោងទាំងនេះ ឃើញថាស្ថានភាពនៃការជន់លិចក៏មិនមានរយៈពេលយូរថ្ងៃ ដូចឆ្នាំកន្លងមកដែរ។ ការជន់លិចអាចនៅមានដោយសារស្ដានភាពភ្លៀងជាប់ៗគ្នាជាច្រើន ប៉ុន្តែយ៉ាងណា អាជ្ញាធរ រួមទាំងមន្ទីរជំនាញមិនបានទំនេរដៃដោះស្រាយនោះទេ។ លោកស្រីសូមមេត្តាយោគយល់អធ្យាស្រ័យចំពោះករណីនេះ»៕
|