លោក សំ វិច្ឆិកា អ្នកនាំពាក្យស្នងការដ្ឋាននគរបាលរាជធានីភ្នំពេញ បានឲ្យដឹងថា ចំពោះករណីនេះ លោកឧត្តមសេនីយ៍ទោ ហេង រតនា ស្នងការរងផែននគរបាលចរាចរណ៍ បានធ្វើការស្រាវជ្រាវជាបន្ទាន់ និងបានអញ្ជើញមន្រ្តីនគរបាលចរាចរណ៍ម្នាក់ និងមន្រ្តីកិច្ចសន្យាម្នាក់ ដែលពាក់ព័ន្ធបញ្ហានេះ មកសួរនាំនៅការិយាល័យនគរបាលចរាចរណ៍។

លោកបានគូសបញ្ជាក់ថា ក្រោយមានការសួរនាំរួច តាមបញ្ជារបស់ ឧត្តមសេនីយ៍ឯក ជួន ណារិន្ទ អគ្គស្នងរងនិងជាស្នងការនគរបាលរាជធានីភ្នំពេញ លោកអនុសេនីយ៍ឯក ហោ ផល្លី ត្រូវបានឱ្យផ្អាកការងារបណ្តោះអាសន្ន អនុវត្តវិន័យ នៅការិយាល័យបុគ្គលិកនៃផែនការងារធនធានមនុស្ស ដើម្បីធ្វើរបាការណ៍សុំគោលការណ៍អគ្គស្នងការដ្ឋាននគរបាលជាតិ បន្តនីតិវិធី។

ដោយឡែក មន្រ្តីកិច្ចសន្យា ឈ្មោះ ស៊ឹម រដ្ឋា ត្រូវស្នងការដ្ឋាននគរបាលរាជធានីភ្នំពេញ ស្នើសុំទៅរដ្ឋបាលរាជធានីភ្នំពេញ បណ្តេញចេញពីមន្រ្តីកិច្ចសន្យារបស់រដ្ឋបាលរាជធានីភ្នំពេញ។ សូមបញ្ជាក់ថា ថវិកាដែលមន្រ្តីខាងលើយកពីជនបរទេសនោះ ត្រូវបានប្រគល់ឱ្យសាមីខ្លួននោះវិញហើយ៕