ថ្លែងក្នុងសន្និសីទសារព័ត៌មានពាក់ព័ន្ធស្ថានការណ៍នៃការឈ្លានពានរបស់ភាគីថៃមកលើដែនអធិបតេយ្យភាពកម្ពុជា នាព្រឹកថ្ងៃទី២៥ ខែកក្កដា ឆ្នាំ២០២៥ នៅទីស្តីការគណៈរដ្ឋមន្ត្រីលោកស្រីឧត្តមសេនីយ៍ឯក ម៉ាលី សុជាតា បានមានប្រសាសន៍ថា នៅថ្ងៃទី២នៃការធ្វើសង្គ្រាមឈ្លានពានពីសំណាក់ភាគីថៃមកលើកម្ពុជា កងទ័ពថៃបានធ្វើការបាញ់គ្រាប់បែកចង្កោមមកលើទឹកដីកម្ពុជា ខណៈថ្ងៃទី២៤ ខែកក្កដា មក ទាហានថៃបានធ្វើការវាយប្រហារយ៉ាងកំរោលមកលើកងទ័ពកម្ពុជា ហើយបានប្រើប្រាស់គ្រាប់ធុនធ្ងន់ និងប្រើយន្តហោះ F-16 ដើម្បីទម្លាក់គ្រាប់បែកផងដែរ។ លោកស្រីបញ្ជាក់ថា សម្រាប់ថ្ងៃទី២៥ ខែកក្កដា នេះដែលជាថ្ងៃទី២នៃសង្គ្រាមឈ្លានពានរបស់ថៃ គឺនៅវេលាម៉ោង៣ និង២០នាទី ទាហានថៃបានធ្វើការវាយប្រហារនៅតំបន់ភ្នំខ្មោច តាថាវ និងភ្នំ៣៣៣ ។
នៅវេលាម៉ោង៥៖២៥នាទី កងទ័ពថៃបានប្រើគ្រាប់បែកចង្កោមវាយប្រហារមកលើតំបន់ភ្នំខ្មោច និងម៉ោង៥៖៣០នាទី កងទ័ពថៃក៏បានធ្វើការវាប្រហារនៅតំបន់ប្រាសាទតាមាន់ និងប្រាសាទតាក្របី ខណៈនៅវេលាម៉ោង៥៖៤០នាទី កងទ័ពថៃបានធ្វើការវាយប្រហារនៅតំបន់មុំបី និង ម៉ោង៦៖៥០នាទី ថៃក៏បានបាញ់គ្រាប់បែកចង្កោមលើកទី២ មកលើភូមិតេជោសន្តិភាព ស្ថិតក្នុងស្រុកជាំក្សាន្ដ ខេត្តព្រះវិហារ។
លោកស្រីបានបន្ដថា នៅវេលា ម៉ោង៧ និង0៣នាទី កងទ័ពថៃបានបាញ់ចូលគោលដៅនៅតំបន់ជាំតែ និងម៉ោង ៨៖០០នាទី ថៃក៏បានព្យាយាមវាយយកប្រាសាទតាក្របីវិញ ប៉ុន្តែកងកម្លាំងរបស់កម្ពុជាបានតស៊ូយ៉ាងស្វិតស្វាញ និងប្តេជ្ញាឱ្យខានតែបានមិនឱ្យមានការរំលោភដែនអធិតេយ្យភាពកម្ពុជាវិញបាននោះទេ។
ជាមួយគ្នានេះ អ្នកនាំពាក្យក្រសួងការពារជាតិ ការពង្រាយគ្រាប់បែបចង្កោមជាការគំរាមកំហែងយូរអង្វែងដល់ជនស៊ីវិល និងបរិស្ថាន គឺជាឧក្រិដ្ឋកម្មសង្គ្រាម ក្រោមច្បាប់អន្តរជាតិ និងបំផ្លិចបំផ្លាញសន្តិ ភាព និងសន្តិសុខក្នុងតំបន់។ លោកស្រីបានអះអាងថា គិតចាប់ពីម៉ោង ៣ រំលងអាទ្រាត មកដល់ពេលនេះ ក៏នៅមានការវាយប្រហារពីសំណាក់កងទ័ពថៃមកលើកកងទ័ពកម្ពុជាផងដែរ។
លោកស្រី ម៉ាលី សុជាតា បន្ដថា កម្ពុជាបញ្ជាក់ជំហរសាជាថ្មីថា កម្ពុជារក្សាគោលការណ៍ការពារខ្លួនដោយផ្តោតលើគោលដៅយោធា និងមិនផ្តោតលើទីតាំងស៊ីវិលណាមួយឡើយ។
ទន្ទឹមនឹងនេះ លោកស្រី ម៉ាលី សុជាតា អំពាវនាវដល់សហគមន៍អន្តរជាតិ ធ្វើការថ្កោលទោសដោយមិនស្ទាក់ស្ទើរ និងយ៉ាងម៉ឺងម៉ាត់ ចំពោះសកម្មភាពខុសច្បាប់របស់ភាគីថៃ ហើយត្រូវឱ្យភាគីថៃទទួលខុសត្រូវចំពោះការរំលោភបំពានយ៉ាងកម្រោលរបស់ខ្លួន៕