ក្នុងឱកាសអញ្ជើញជាអធិបតីពិធីអបអរសាទរខួបអនុស្សាវរីយ៍លើកទី៤៨ ទិវានៃការចងចាំដំណើរឆ្ពោះទៅផ្តួលរំលំរបបប្រល័យពូជសាសន៍ ប៉ុល ពត និងខួបលើកទី៤៧ ថ្ងៃបង្កើតកងកម្លាំងប្រដាប់អាវុធសាមគ្គីសង្រ្គោះជាតិកម្ពុជា នៅព្រឹកថ្ងៃទី២០ ខែមិថុនា ឆ្នាំ២០២៥នេះ លោកនាយឧត្តមសេនីយ៍ ទៀ សីហា បានសង្កត់ធ្ងន់ថា ការបំពាន MoU ឆ្នាំ២០០0 គឺថៃជាអ្នកបំពានលើសពីកម្ពុជាដាច់តែម្តង។

លោកបង្ហាញការអស់សំណើចដែលក្នុងកិច្ចប្រជុំ JBC កន្លងទៅភាគីថៃ បានចោទប្រកាន់កម្ពុជាថា បំពាន MoU ឆ្នាំ២០០០។ អ្វីដែលថៃចោទកម្ពុជាបំពាននោះ ដូចជាការធ្វើស្រែលើសព្រំដែន និងឡើងច្រៀងលើប្រាសាទតាមាន់ជាដើម ខណៈថៃខ្លួនឯងបំពានកម្ពុជាដាច់តែម្ដង។

លោកបន្ថែមថា ភាគីថៃតែងទាមទារចង់បានសន្ដិភាព និងមិនចង់មានបញ្ហាជាមួយកម្ពុជា ព្រមទាំងបានចាត់ទុកថា ការដាក់ទ័ពរបស់គេមកព្រំដែនដើម្បីការពារ ដូច្នេះកម្ពុជាពង្រាយកម្លាំងទ័ពក៏ដើម្បីការពារបូរណភាពទឹកដី និងអធិបតេយ្យភាពដូចគ្នា៕