សម្តេចមហាបវរធិបតីបានលើកទឹកចិត្តដល់សាស្ដ្រាចារ្យ និងនិស្សិតខ្មែរទាំងក្នុង និងក្រៅប្រទេសដែលបានស្រាវជ្រាវឯកសារផ្សេងៗរួចហើយ ពីជំនាន់មួយទៅជំនាន់មួយ សុំយកតម្កល់ទុក នៅក្នុងបណ្ណាល័យ និងតាមសាកលវិទ្យាល័យផ្សេងៗ ដើម្បីទុកជាកេរដំណែលសម្រាប់និស្សិត និងអ្នកស្រាវជ្រាវជំនាន់ក្រោយបន្តបន្ទាប់ទៀត ដែលជារបកគំហើញរបស់កូនខ្មែរ។

សម្តេចមហាបវរធិបតីណែនាំដល់សិស្សកុំពឹងផ្អែកទៅលើឧបករណ៍ខ្លាំងពេកលើការសិក្សារៀនសូត្រ និងស្រាវជ្រាវ ដែលនាំឱ្យសិស្សបាត់បង់មូលដ្ឋានគ្រឹះក្នុងការសិក្សារៀនសូត្រ ខ្វះខាតការអាន និងសរសេរ ឈានទៅខ្សោយសមត្ថភាពនាពេលខាងមុខ។ ប៉ុន្ដែត្រូវបែរមកខិតខំសិក្សាស្រាវជ្រាវ អាន និងសរសេរ សង្ខេបដោយខ្លួនឯង ទើបអាចឱ្យមានចំណេះពិតប្រាកដ។

ជាមួយគ្នានេះ សម្តេចមហាបវរធិបតីក៏បង្ហាញការកោតសរសើរ ដែលសាលារៀនរៀបចំឱ្យមានការប្រកួត ប្រជែងតស៊ូមតិរបស់សិស្ស នៅតាមសាលារៀន ដែលធ្វើឱ្យសិស្សមានសមត្ថភាពក្នុងការស្រាវជ្រាវ និងការអានមានការកើនឡើង៕