ថ្លែងក្នុងឱកាសអញ្ជើញជាអធិបតីក្នុងពិធីសម្ពោធបើកឱ្យប្រើប្រាស់ជាផ្លូវការកំពង់ផែទេសចរណ៍អន្តរជាតិកំពត នៅព្រឹកថ្ងៃទី២១ ខែមេសា ឆ្នាំ២០២៥នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ថា ចិនប្រកាសជួយព្រែកជីកហ្វូណន ដោយសារកំពុងឈ្លោះគ្នាជាមួយអាម៉េរិក? រើសចិនស្ពៃ? រើសអាម៉េរិកសាច់គោ? សម្តេច ហ៊ុន ម៉ាណែត អស់សំណើច ចំពោះការវិភាគបែបនេះ។ ប្រមុខរដ្ឋាភិបាលថា ជាការវិភាគដែលគ្មានទឡ្ហីករណ៍ច្បាស់លាស់។ សម្តេចបានបញ្ជាក់ថា ការប្រកាសរបស់លោកប្រធានាធិបតីចិន ស៊ី ជិនភីង នាអំឡុងទស្សនកិច្ចនៅកម្ពុជាកន្លងមក គ្រាន់តែជាការប្រកាសបន្ថែមប៉ុណ្ណោះ។

សម្តេចធិបតីបន្ដថា រដ្ឋាភិបាលមិនចាំបាច់ឆ្លើយតបនូវរាល់ការរិះគន់ចោទប្រកាន់នោះឡើយ ពោលគឺត្រូវតែបន្តធ្វើ។ ត្រង់ន័យនេះ សម្តេចធិបតីបានដកស្រង់សំដីអតីតនាយករដ្ឋមន្ត្រីអង់គ្លេស Winston Churchill ដែលថា «បើយើងរវល់តែរើសដុំថ្មគប់ឆ្កែគ្រប់ទីកន្លែង យើងដើរមិនដល់គោលដៅនោះឡើយ»។

សម្ដេចធិបតីបានបញ្ជាក់ថា តាមរយៈសេចក្តីថ្លែងការណ៍រួមកម្ពុជា និងចិន ក្នុងឱកាសដំណើរទស្សនកិច្ចផ្លូវរដ្ឋរបស់លោក ស៊ី ជីនពីង ប្រធានាធិបតីចិន ភាគីចិនបញ្ជាក់ជាថ្មីនូវការគាំទ្រយ៉ាងពេញទំហឹងចំពោះកម្ពុជា ក្នុងការប្រកាន់មាគ៌ាអភិវឌ្ឍន៍ដោយ ឯករាជ្យ និងស្របតាមលក្ខខណ្ឌជាតិរបស់កម្ពុជា ព្រមទាំងគាំទ្រកម្ពុជាដោយឥតងាករេ ចំពោះការការពារ អធិបតេយ្យភាពជាតិ ឯករាជ្យភាព និងបូរណភាពទឹកដី ព្រមទាំងតួនាទីកាន់តែសកម្ម និងសំខាន់របស់កម្ពុជា ក្នុងកិច្ចការតំបន់ និងអន្តរជាតិ។

ទន្ទឹមនឹងនេះ សម្តេចធិបតីថ្លែងថា ក្រុមជ្រុលនិយម បង្កើតការចាប់អារម្មណ៍កាន់តែច្រើន កាន់តែបាត់បង់ជំនឿទុកចិត្ដពីពលរដ្ឋ និងជីកដីកប់ខ្លួនឯង ខណៈដែលរាជរដ្ឋាភិបាលបង្ហាញសមិទ្ធផលជាក់ស្ដែងផងដែរ៕