ថ្លែងក្នុងកិច្ចប្រជុំពិនិត្យពិភាក្សាលើវឌ្ឍនភាព ការងារជារូបវ័ន្តនៃគម្រោងលើកកម្រិតគុណភាពផ្លូវជាតិលេខ៤៨ ក្នុងភូមិសាស្ត្រខេត្តកោះកុង ដោយមានការអញ្ជើញចូលរួមពីថ្នាក់ដឹកនាំ និងសមាជិកនៃអង្គភាពគ្រប់គ្រងគម្រោង តំណាងក្រុមហ៊ុនសាងសង់ និងមន្ត្រីបច្ចេកទេសពាក់ព័ន្ធ កាលពីព្រឹកថ្ងៃទី២៥ ខែមេសា ឆ្នាំ២០២៤ លោក ហេង រត្នពិសិដ្ឋ អគ្គនាយក នៃអគ្គនាយកដ្ឋានសាធារណការ និងជាប្រធានគ្រប់គ្រងគម្រោង បានលើកឡើងថា កិច្ចប្រជុំនេះ ដើម្បីពិនិត្យវឌ្ឍនភាពការងារសាងសង់ ស្ថានភាពជាក់ស្តែងនៃការអនុវត្តគម្រោង និងជំរុញផែនការអនុវត្តការគម្រោងតាមកំណាត់ផ្លូវនីមួយៗ សំណូមពរ បញ្ហាប្រឈម ដំណោះស្រាយរបស់ក្រុមហ៊ុន និងទិសដៅការងារបន្ត ។

លោកបានបញ្ជាក់ថា ផ្លូវជាតិលេខ៤៨នេះ នឹងពន្លឿនការងារសាងសង់នៅក្នុងរដូវប្រាំងនេះ ឱ្យសម្រេចបានតាមគម្រោងផែនការដែលបានកំណត់ និងគោរពតាមបទដ្ឋានបច្ចេកទេស។

សូមបញ្ជាក់ថា គម្រោង សាងសង់ផ្លូវជាតិ លេខ៤៨ បានប្រារព្ធពិធីបើកការដ្ឋាន កាលពីថ្ងៃទី០៣ ខែមករា ឆ្នាំ២០២២។ ខ្សែផ្លូវប្រវែង ១៤៨ គីឡូម៉ែត្រនេះចាប់ផ្តើម នៅត្រង់ចំណុច បំបែក ផ្លូវជាតិលេខ៤ ចំណុចបង្គោលគីឡូម៉ែត្រលេខ ១៤១+៧៥០ (ចំការហ្លួង) រហូតដល់ក្រុងខេមរភូមិន្ទ នៃខេត្តកោះកុង ជាប្រភេទផ្លូវបេតុងកៅស៊ូ(AC) កម្រាស់ ៧ស.ម និងជាប្រភេទបេតុងសរសៃដែក ត្រង់ផ្លូវប្រសព្វ ដែលមានកម្រាស់ ២៥ស.ម ដោយអនុវត្តក្រោមទំហំទឹកប្រាក់ប្រមាណជាង ៧៨លានដុល្លារអាមេរិក។ ផ្លូវជាតិដែល គ្រោងចំណាយទឹកប្រាក់ ៧៨លានដុល្លារនេះរួមមាន៖ ផ្លូវ២គន្លង មានប្រវែង ១២២,៩គីឡូម៉ែត្រ ទទឹងផ្លូវ ១១ម៉ែត្រ និង ផ្លូវ៤គន្លង មានប្រវែង២៥,១គីឡូម៉ែត្រ ទទឹងចាប់ពី ១៨,៥ម៉ែត្រ ដល់ ២១,៥ម៉ែត្រ៕