ថ្លែងក្នុងឱកាសអញ្ជើញជាអធិបតីក្នុងពិធីសម្ពោធអគារបម្រើសេវាវះកាត់បំពាក់ឧបករណ៍ដ៏ទំនើបនៅមន្ទីរ ពេទ្យបង្អែក ខេត្តសៀមរាប ដែលមានតម្លៃជិត២០លានដុល្លារ ជាជំនួយរបស់រាជរដ្ឋាភិបាល និងប្រជាជន ជប៉ុន នៅព្រឹកថ្ងៃទី២០ ខែមេសា ឆ្នាំ២០២៤នេះ សម្តេចមហាបវរធិបតីហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ថា គោលដៅធំរបស់រាជរដ្ឋាភិបាលទៅថ្ងៃក្រោយ គឺចង់ឱ្យគ្រប់រាជធានីខេត្តទាំងអស់មានសមត្ថភាពសុខាភិបាលកម្រិតខ្ពស់ ប៉ុន្តែយើងមិនទាន់អាចធ្វើបានទេ ដូច្នេះហើយជាជំហានដំបូងយើងត្រូវពង្រីកមន្ទីរពេទ្យតំបន់ ដើម្បីបំពេញឱ្យមន្ទីរពេទ្យនៅរាជធានីភ្នំពេញ។

សម្តេចធិបតី ហ៊ុន ម៉ាណែត បានបញ្ជាក់ថា មន្ទីរពេទ្យនៅខេត្តសៀមរាបនេះ គឺជាមន្ទីរពេទ្យតំបន់ ដើម្បីធានាដល់ការជួយសម្រាលមន្ទីរពេទ្យនៅភ្នំពេញ តាមរយៈការរុញសេវាកម្រិតខ្ពស់ឱ្យនៅកៀកប្រជាពលរដ្ឋ។ សម្តេចបានបន្ថែមថា កន្លងទៅថ្មីៗនេះរាជរដ្ឋាភិបាលកម្ពុជា បានចុះកិច្ចព្រមព្រៀងកម្ចីឥណទានពីរដ្ឋាភិបាលជប៉ុនតាមរយៈ JICA ក្នុងទំហំទឹកប្រាក់ ១៤១លានដុល្លារ ដើម្បីយកមកអភិវឌ្ឍមន្ទីរពេទ្យតំបន់ចំនួន២ គឺសៀមរាប និងកំពង់ចាម។

សម្តេចធិបតី ហ៊ុន ម៉ាណែត បានបន្ដថា រាជរដ្ឋាភិបាលបានដាក់ចេញគោលដៅបំពាក់បរិក្ខារពេទ្យទំនើបៗទៅគ្រប់មន្ទីរពេទ្យ តែក៏ត្រូវបណ្តុះបណ្តាលគ្រូពេទ្យជំនាញផងដែរ ដើម្បីឆ្លើយតបរវាងបរិក្ខារទំនើប និងគ្រូពេទ្យជំនាញ៕