ថ្លែងក្នុងពិធីបិទវគ្គបណ្តុះបណ្តាល និងហ្វឹកហ្វឺន នៅសាកលវិទ្យាល័យការពារជាតិ នាព្រឹកថ្ងៃទី១៩ ខែមេសា ឆ្នាំ២០២៤ ការអនុវត្តភារកិច្ចស្នូលរបស់ខ្លួន កងយោធពលខេមរភូមិន្ទ ត្រូវតែជាកម្លាំងមានឧត្តមគតិស្មោះត្រង់ដាច់ខាតចំពោះជាតិ រាជរដ្ឋាភិបាល និងត្រូវមានសមត្ថភាពគ្រប់គ្រាន់ក្នុងកិច្ចការពារឯករាជ្យ អធិបតេយ្យភាពជាតិ ឯកភាពទឹកដីនៃកម្ពុជា ការពារសន្តិភាព ការពាររាល់សមិទ្ធផលសង្គមជាតិ សមិទ្ធផលនៃនយោបាយឈ្នះឈ្នះឱ្យបានគង់វង្ស។
សម្ដេចធិបតី បានណែនាំឱ្យកងទ័ពរួមចំណែកដល់ការកសាងនីតិរដ្ឋ អភិវឌ្ឍន៍ប្រទេសជាតិ ហើយត្រៀមលក្ខណៈគ្រប់កាលៈទេសៈរាល់ប្រតិបត្តិការដែលរាជរដ្ឋាភិបាលប្រគល់ជូនឱ្យមានប្រសិទ្ធភាព។
សម្ដេចធិបតី សង្កត់ធ្ងន់ដល់តួនាទីដ៏សំខាន់របស់កងយោធពលខេមរភូមិន្ទក្នុងការប្រឆាំងដាច់ខាតនូវឧបាយកល និងសកម្មភាពទាំងឡាយណាដែលក្នុងបំណងចង់បំផ្លាញដល់សុខសន្តិភាពនៅកម្ពុជាដែលខិតខំរកបានដោយលំបាក ក្រោមនយោបាយឈ្នះ ឈ្នះ របស់សម្ដេចតេជោ ហ៊ុន សែន។
សម្ដេចធិបតី លើកឡើងថា៖ «កងយោធពលខេមរភូមិន្ទ ត្រូវតែជាកម្លាំងមានថាមពលខ្លាំង សមត្ថភាពពេញលេញ ឆន្ទៈមុតមុះ និងវិន័យល្អ ការពារបានរឹងមាំនូវឯករាជ្យជាតិ អធិបតេយ្យភាព ឯកភាពទឹកដី សន្តិសុខ សណ្ដាប់ធ្នាប់សង្គមនៅគ្រប់កាលៈទេសៈ ដោយសំដៅធ្វើឱ្យបរាជ័យរាល់ឧបាយកល និងសកម្មភាពរបស់កម្លាំងអមិត្ត ទាំងក្នុង និងក្រៅប្រទេស ដែលប៉ុនប៉ងបង្កើតបដិវត្តពណ៌នៅកម្ពុជា បង្កអសន្តិសុខដល់សង្គមជាតិ»។
សម្ដេចធិបតី ប្រកាសថា ទោះក្នុងតម្លៃណាក៏ដោយ ត្រូវតែថែរក្សា និងការពារសុខសន្តិភាពនេះឱ្យបាន ហើយកងទ័ពត្រូវមានភាពសកម្មក្នុងការរួមចណែកទប់ស្កាត់បទល្មើសនានាក្នុងសង្គមឱ្យបានទាន់ពេលវេលាផងដែរ៕