ការចុះបង្ក្រាបខាងលើបានធ្វើឡើង កាលពីល្ងាចថ្ងៃទី២៨វិច្ឆិកា២០២៣ ក្រោមបទបញ្ជារបស់លោក ឧត្តមសេនីយ៍ត្រី អៀង វ៉ាន់ឌី មេបញ្ជាការអាវុធហត្ថខេត្តស្ទឹងត្រែង ព្រមទាំង ដឹកនាំចុះផ្ទាល់ដោយលោក ជា សុភ័ក្ក ព្រះរាជអាជ្ញារង អមសាលាដំបូងខេត្ត ក្រោយតាមដាន និងស្រាវជ្រាវអំពីសកម្មភាពដឹកជញ្ជូន ឈើពីប្រភពខាងក្រៅចូលទៅក្នុង ក្រុមហ៊ុនចំការចេក ដោយពុំមាន ច្បាប់អនុញ្ញាត។

ប្រភពបានអោយដឹងថា:ក្រុមហ៊ុន ចំការចេកខាងលើ ក្រៅពីដាំដំណាំ កសិកម្ម គឺពុំមានសិទ្ធិក្នុងការទិញលក់ ឬដឹកជញ្ជូនផលអនុផលព្រៃឈើនោះទេ។ បើមានសិទ្ធិក៏ត្រូវមានប្រភពទីតាំង ព្រៃសម្បទានពីរដ្ឋច្បាស់លាស់ និងត្រូវមានការឆ្លងកាត់ត្រួតពិនិត្យច្បាប់ អនុញ្ញាតពីរដ្ឋបាលព្រៃឈើនិង ច្បាប់ដឹកជញ្ជូនផងដែរ។ ប៉ុន្តែក្រុមហ៊ុននេះពុំបានឆ្លងកាត់ច្បាប់ ណាមួយទេ ទើបកម្លាំងអាវុធហត្ថខេត្ត សហការជំនាញពាក់ព័ន្ធចុះបង្ក្រាប តែម្តង។

មន្ត្រីជំនាញបានអោយដឹងថា: ឈើទាំងនោះជាប្រភេទឈើក្រៅ លំដាប់ថ្នាក់។ បើតាមការប៉ាន់ស្មាននិងមិនទាន់ជាផ្លូវការ ឈើទាំងអស់នោះគឺមានចន្លោះ ពី៣៥ទៅ៤០ម៉ែត្រគូប។

មន្ត្រីជំនាញបន្តថា:ឈើទាំងនោះគឺ ក្រុមហ៊ុនចំការចេក បានបញ្ជាទិញ ពីប្រភពខាងក្រៅដឹកចូលក្រុមហ៊ុន ដើម្បីសាងសង់ផ្ទះកម្មករ។ បច្ចុប្បន្ន ឈើទាំងអស់នោះកំពុង ត្រួតពិនិត្យនិងធ្វើការវាស់វែង។