ប្រតិបត្តិការនេះបានធ្វើឡើងនៅព្រឹកថ្ងៃទី ១១ ខែកញ្ញាឆ្នាំ ២០២៣ ដោយមានការណែនាំពីលោក ឃួង ស្រេង អភិបាលរាជធានីភ្នំពេញនិងមានការចង្អុលបង្ហាញ ដោយលោក ជា ពិសី អភិបាលខណ្ឌទួលគោក ចាត់ឲ្យលោក អភិបាលរងទទួលបន្ទុក បរិស្ថាន អនាម័យ សន្តិសុខសណ្ដាប់ធ្នាប់សាធារណៈ ដឹកនាំកម្លាំងគណៈបញ្ជាការឯកភាពខណ្ឌ ចុះ បាញ់ទឹកលាងសម្អាតនិងចងខ្សែ មិនអនុញ្ញាតឲ្យអាជីវករលក់ដូរបន្លែផ្លែឈើបន្តលក់នៅលើផ្លូវ ២៣០ នេះបន្តទៀតឡើយ។

លោក ស៉ឹម សុផង់ អភិបាលរង ទទួលបន្ទុក បរិស្ថាន អនាម័យ សន្តិសុខសណ្ដាប់ធ្នាប់សាធារណៈ នៃអភិបាលខណ្ឌទួលគោក បានឲ្យដឹងថា កន្លងមកអាជីវករលក់ដូរទៅតាមបណ្ដោយផ្លូវលេខ ២៣០ នេះបានតាំងលក់លើទ្រូងផ្លូវបង្ករឲ្យមានការកកស្ទះ ចរាចរណ៍និងជាពិសេសនោះ អ្នកលក់បន្លែផ្លែឈើ មិនបានវេចខ្ចប់ទុកដាក់សំរាមឲ្យបានត្រឹមត្រូវបណ្ដាលឲ្យហូរ សំរាមទាំងនោះចូលមាត់លូរ កកស្ទះប្រព័ន្ធទឹកហូរចូលលូនិងមានការជនលេចពេលភ្លៀងធ្លាក់ខ្លាំងម្ដងៗនៅចំណុចផ្លូវ ២៣០ កែងនឹងមហាវិថីម៉ៅសេទុងនេះ។

លោកអភិបាលរង បានបន្ថែមថាការលក់ដូរតាមបណ្ដោយផ្លូវលេខ ២៣០ នេះពេលថ្ងៃគឺដាច់ខាតមិនអនុញ្ញាតឲ្យអាជីវករលក់បន្លែផ្លែឈើបន្តទៀតឡើយ។ដោយឡែកពេលយប់គឺអនុញ្ញាតឲ្យលក់ជាបណ្ដោះអាសន្នក៏ប៉ុន្តែមិនឲ្យតាំងលក់លើទ្រង់ផ្លូវនោះទេដើម្បីពលរដ្ឋងាយស្រួលធ្វើដំណើរ នឹងធ្វើយ៉ាងណាពេលព្រឹកព្រលឹមម៉ោង ៦កន្លះទៅម៉ោង៧ ព្រឹក បរិស្ថានអនាម័យត្រូវតែស្អាត។

ជាចុងក្រោយ លោកអភិបាលរង បានសង្កត់ធ្ងន់ថាក្រោយមានការបាញ់ទឹកលាងសម្អាតនិងចងខ្សែមិនអនុញ្ញាតឲ្យអាជីវករលក់បន្លែផ្លែឈើនោះ អាជ្ញាធរនិងបានដាក់កម្លាំងសណ្ដាប់ធ្នាប់ប្រចាំការក្នុងករណីអាជីវករនៅតែមិនអនុវត្តតាមការណែនាំរបស់អាជ្ញាធ នៅតែរំលោភបំពានតាំងលក់ឬកាត់ខ្សែ អាជ្ញាធរវិធានអនុវត្តរដ្ឋបាល និងចាត់ការតាមនីតិវិធី៕