លើសពីនេះ អនុលោមតាមស្មារតីលិខិតលេខ ៣៥០សជណ ចុះថ្ងៃទី២៨ ខែមីនា ឆ្នាំ២០២៣ របស់ទីស្ដីការគណៈរដ្ឋមន្ដ្រី រាជរដ្ឋាភិបាលកម្ពុជា បានយល់ព្រមដូចខាងក្រោម ៖ ១-ទទួលស្គាល់សមាគមឧកញ៉ាកម្ពុជា ជាស្ថាប័នឯកជនតែមួយគត់ ដែលតំណាងឲ្យបុគ្គល ដែលទទួលបានគោរមងារ ឧកញ៉ា ទាំងអស់នៅកម្ពុជា ។ ២-ផ្ដល់នូវការទទួលស្គាល់មួយកម្រិតទៀតជាផ្លូវការរបស់រាជរដ្ឋាភិបាល ដោយផ្ដោតជាសំខាន់លើភាពជាដៃគូរបស់រាជរដ្ឋាភិបាល ក្នុងការជំរុញលើកកម្ពស់សកម្មភាពពាណិជ្ជកម្ម និងការវិនិយោគនៅក្នុងព្រះរាជាណាចក្រកម្ពុជា ។ ៣-សមាគមឧកញ៉ាកម្ពុជា ស្ថិតនៅក្រោមអភិបាលកិច្ចផ្នែកបច្ចេកទេសរបស់ក្រុមប្រឹក្សាអភិវឌ្ឍន៍កម្ពុជា ( ក.អ.ក )​ ដែលសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា ជាប្រធានកិត្តិយស នៃសមាគមឧកញ៉ាកម្ពុជា ។ ៤-អនុញ្ញាតឲ្យសមាគមឧកញ៉ាកម្ពុជា ចូលរួមជាមួយសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា ក្នុងបេសកកម្មមួយចំនួនទាំងក្នុង និងទាំងក្រៅប្រទេស ដែលជំរុញលើកកម្ពស់ការធ្វើពាណិជ្ជកម្ម និងការវិនិយោគក្នុងព្រះរាជាណាចក្រកម្ពុជា ។

គួរបញ្ជាក់ថា គិតត្រឹមដើមឆ្នាំ២០២៣នេះ បុគ្គល ដែលទទួលបានគោរមងារជា អ្នកឧកញ៉ា និងឧកញ៉ា មានចំនួន ជាង១ ៣០០នាក់ ប៉ុន្តែមិនទាន់បានដឹងថា មានអ្នកឧកញ៉ា និងឧកញ៉ា ប៉ុន្មាននាក់នោះក្លាយជាសមាជិកសមាគមឧកញ៉ាកម្ពុជា នៅឡើយទេ ៕