ក្នុងកម្មវិធីវគ្គបណ្តុះបណ្តាលស្តីពី "ការបញ្ឈប់ការចោលសំរាមមិនត្រឹមត្រូវ"នៅសណ្ឋាគារកាំបូឌីយ៉ាណា ព្រឹកថ្ងៃទី២៩ មីនា ដែលមានការចូលរួមពីក្លឹបអ្នកកាសែតកម្ពុជា និងអ្នកសារព័ត៌មាន លោក អ៊ុក សុវណ្ណ បានបញ្ជាក់ទៀតថា គម្រោងនេះផ្ដោតលើកត្តាសំខាន់ៗចំនួនបី ទី១ កាត់បន្ថយការប្រើប្រាស់គ្រឿងសង្ហារឹមដោយប្រើឈើប្រណីត ។ ទី២ កាត់បន្ថយការហូប ការទិញសត្វព្រៃ ។ ទី៣ បញ្ឈប់ការចោលសំរាមផ្ដេសផ្ដាស។
ប្រធានក្លឹបអ្នកកាសែតកម្ពុជា លោក ពុយ គា បានថ្លែងថា បច្ចុប្បន្ននៅកម្ពុជាផ្នែកអនាម័យមានការប្រែច្រើន ។ លោក ថា ចង់ឱ្យកម្ពុជាស្អាតនិងមានអនាម័យ ។
លោក ងែត វិបុល អនុប្រធាននាយកដ្ឋានសំណល់រឹង នៃក្រសួងបរិស្ថាន បានបញ្ជាក់ថា មនុស្សជាអ្នកបង្កើតសំរាម ។ លោក ងែត វិបុល បានបន្ថែមខ្លឹមសារថា សំណល់រឹង គឺសំដៅទៅលើវត្ថុរឹង សារធាតុរឹង ផលិតផលឬកម្ទេចកម្ទី ដែលលែងត្រូវការប្រើប្រាស់ហើយដែលត្រូវបោះបង់ចោលមានបំណង និងបោះបង់ចោល ឬតម្រូវការឱ្យបោះបង់ចោលដោយច្បាប់ ( អនុក្រឹត្យ លេខ៣៦ អនុក្រ.បក ស្ដីពីការគ្រប់គ្រងសំណល់រឹង ) ។ តើសំរាម សំណង់រឹងទីប្រជុំជន ជាអ្វី ? យោងតាមអនុក្រឹត្យ លេខ ១១៣ អនក្រ . បក ។ *សំរាម សំដៅដល់របស់របរប្រើប្រាស់សម្ភារៈផលិតផលដែលបានបន្សល់ ឬបង្កើតពីជីវភាពផ្ទាល់របស់មនុស្សប្រចាំថ្ងៃ ដែលមិនផ្ទុកសារធាតុពុល ឬសំណល់គ្រោះថ្នាក់ ។ *សំណល់រឹងទីប្រជុំជន សំដៅដល់សំណល់រឹងដែលបានបន្សល់ឬបង្កើតពីសកម្មភាពអាជីវកម្មឬសេវាកម្មដែលមិនមានផ្ទុកសារធាតុឬសំណល់គ្រោះថ្នាក់ ។
យោងតាមមាត្រា៦ ក្រសួងបរិស្ថាន ត្រូវធ្វើការត្រួតពិនិត្យ លើការអនុវត្តក្នុងការបោះចោល ប្រមូល ដឹកជញ្ជូន ស្តុក កែច្នៃ កាត់បន្ថយ និងការចាក់ចោលសំរាមតាមបណ្ដាខេត្ត ក្រុង ។ ដោយឡែកមាត្រា៧ ហាមដាច់ខាត ការបោះចោល ឬចាក់ចោលសំរាមតាមទីសាធារណៈ ឬខុសទីកន្លែង ដែលកំណត់ដោយអាជា្ញធរមានសមត្ថកិច្ច ៕