ទំនាក់ទំនងផ្សាយពាណិជ្ជកម្ម : ទូស័ព្ទលេខ និងTelegram 060327222
ប្រធានាធិបតីបារាំង៖ កិច្ចប្រជុំកំពូលហ្វ្រង់កូហ្វូនីនៅរាជធានីភ្នំពេញ គឺជាសក្ខីភាពនៃការផ្សារភ្ជាប់សាមគ្គីភាព និងសន្តិភាពសកល
ថ្ងៃទី ៖ 15-11-2026, ដោយ​​ Dara007 , 46 Views
                     
ភ្នំពេញៈ លោក អេម៉ានុយអែល ម៉ាក្រុង (Emmanuel Macron) ប្រធានាធិបតីនៃសាធារណរដ្ឋបារាំង បានថ្លែងសង្កត់ធ្ងន់ថា ការរៀបចំកិច្ចប្រជុំកំពូលលើកទី២០ នៃអង្គការហ្វ្រង់កូហ្វូនី (OIF) នៅរាជធានីភ្នំពេញ គឺជាសក្ខីភាពដ៏សំខាន់បំផុតក្នុងការផ្សារភ្ជាប់សាមគ្គីភាព ការបើកចំហ និងការពង្រឹងសន្តិភាពសកល ស្របពេលដែលសហគមន៍ប្រើប្រាស់ភាសាបារាំងបានវិលត្រឡប់មកកាន់ទ្វីបអាស៊ីជាថ្មីម្តងទៀត ក្នុងរយៈពេលជិត ៣០ឆ្នាំចុងក្រោយនេះ។

ថ្លែងក្នុងពិធីបើកកិច្ចប្រជុំកំពូលហ្វ្រង់កូហ្វូនីលើកទី២០ នៅរាជធានីភ្នំពេញ ប្រធានាធិបតីបារាំង បានសម្តែងនូវការថ្លែងអំណរគុណយ៉ាងជ្រាលជ្រៅថ្វាយព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ចំពោះការទទួលស្វាគមន៍យ៉ាងកក់ក្តៅ និងការរៀបចំព្រឹត្តិការណ៍ជាប្រវត្តិសាស្ត្រនេះប្រកបដោយមោទនភាព។

លោកប្រធានាធិបតីបារាំង បានលើកឡើងថា ការវិលត្រឡប់មកកាន់ទ្វីបអាស៊ីវិញ បន្ទាប់ពីកិច្ចប្រជុំកំពូលនៅទីក្រុងហាណូយ គឺជាភស្តុតាងបង្ហាញយ៉ាងច្បាស់ថា អង្គការហ្វ្រង់កូហ្វូនី មិនមែនជាកម្មសិទ្ធិផ្តាច់មុខរបស់ប្រទេសណាមួយ ឬទ្វីបណាមួយឡើយ ប៉ុន្តែគឺជាលំហនៃតម្លៃសកលដែលប្រមូលផ្តុំរដ្ឋ និងរដ្ឋាភិបាលចំនួន ៩០ និងប្រជាជនជាង ៤០០លាននាក់ ដើម្បីរួមគ្នាការពារពហុភាគីនិយម សមភាពរវាងរដ្ឋ និងការដោះស្រាយវិបត្តិនានាតាមរយៈកិច្ចសន្ទនា និងនីតិរដ្ឋ។

ក្នុងឱកាសនោះដែរ លោកក៏បានរំលឹកឡើងវិញនូវគុណូបការៈដ៏ថ្លៃថ្លារបស់ស្ថាបនិកទាំង ៤រូប ដែលបានផ្តួចផ្តើមបង្កើតអង្គការហ្វ្រង់កូហ្វូនី កាលពីថ្ងៃទី២០ ខែមីនា ឆ្នាំ១៩៧០ នៅទីក្រុងនីអាម៉េ ជាពិសេសព្រះរាជបូជនីយកិច្ចរបស់ ព្រះករុណា ព្រះបាទសម្តេចព្រះ នរោត្តម សីហនុ ព្រះបរមរតនកោដ្ឋ រួមជាមួយឥស្សរជនអាហ្វ្រិកចំនួន ៣រូបទៀត ដែលបានប្រែក្លាយភាសាបារាំងឱ្យទៅជាឧបករណ៍នៃការរំដោះខ្លួន សេរីភាព និងការផ្សះផ្សាទំនាក់ទំនងរវាងបណ្តាប្រទេសនៅភាគខាងត្បូង និងភាគខាងជើង។

បន្ថែមលើសពីការពង្រឹងសាមគ្គីភាពនយោបាយលោក បានគូសបញ្ជាក់ពីវឌ្ឍនភាពនៃកិច្ចសហប្រតិបត្តិការជាក់ស្តែងក្នុងរយៈពេល ២ឆ្នាំចុងក្រោយ ចាប់តាំងពីកិច្ចប្រជុំកំពូលនៅទីក្រុង Villers-Cotterêts រួមមានការលើកកម្ពស់ការអប់រំ ការបណ្តុះបណ្តាលយុវជន ការជំរុញធុរកិច្ចតាមរយៈពិព័រណ៍ Francotech លើកទី២ នៅកម្ពុជា ព្រមទាំងការការពារភាពចម្រុះនៃភាសានៅក្នុងយុគសម័យបញ្ញាសិប្បនិម្មិត (AI) ដើម្បីធានាថាបច្ចេកវិទ្យានាពេលអនាគតនឹងមិនទុកប្រជាជនណាម្នាក់ចោលនៅក្រៅការអភិវឌ្ឍឡើយ។

មុននឹងប្រកាសប្រគល់តំណែងជាប្រធានកិច្ចប្រជុំកំពូលហ្វ្រង់កូហ្វូនីជាផ្លូវការជូនព្រះរាជាណាចក្រកម្ពុជា ប្រធានាធិបតីបារាំង បានបង្ហាញនូវជំនឿទុកចិត្តយ៉ាងមុតមាំថា ក្រោមការដឹកនាំរបស់សម្តេចមហាបវរធិបតី នាយករដ្ឋមន្ត្រី កម្ពុជានឹងបន្តលើកកម្ពស់មហិច្ឆតារួម តាមរយៈសំឡេងដ៏មានឥទ្ធិពលក្នុងការជំរុញកិច្ចសន្ទនា សកម្មភាព និងសន្តិភាព ដើម្បីនាំមកនូវវិបុលភាពរួម និងស្ថិរភាពយូរអង្វែងសម្រាប់សហគមន៍ហ្វ្រង់កូហ្វូនីទាំងមូល៕

COUNTACT US
Email : campost2022@gmail.com
ទំនាក់ទំនងផ្សាយពាណិជ្ជកម្ម ៖ 017 32 36 36
អាសយដ្ឋាន ៖ ផ្ទះលេខ168 ផ្លូវបេតុង ភូមិគោកឃ្លាង សង្កាត់គោកឃ្លាង ខណ្ឌសែនសុខ រាជធានីភ្នំពេញ
FOLLOW US
                     
        

Copyright @ 2017-2024, Campost.asia, campost2022@gmail.com