សម្តេចធិបតី មានប្រសាសន៍ថា ថ្មីៗនេះ ធានាគារជាតិបោះពុម្ពក្រដាសប្រាក់៥ម៉ឺន និង១០ម៉ឺនថ្មី ដើម្បីបង្កើតសោភ័ណភាព និងសុវត្ថិភាព ដោយក្រដាសប្រាក់ថ្មី មានបង្កប់លក្ខណៈពិសេសដើម្បីផ្ទៀងផ្ទាត់។ ការបោះក្រដាសប្រាក់ថ្មីនេះ ដើម្បីបំពេញទៅលើក្រដាសប្រាក់ចាស់ដែលកិនកម្ទេចចោល បន្ទាប់ពីខែឧសភា ដល់ខែកញ្ញា ធនាគារជាតិ កិនកម្ទេចក្រដាសប្រាក់ចាស់សរុប ៤៣៥លានសន្លឹក ។

សម្ដេចធិបតីបានគូសបញ្ជាក់ថា រឿងបោះពុម្ពក្រដាសប្រាក់ថ្មីនេះ គឺមានអ្នកបំភ័យប្រជាពលរដ្ឋឱ្យទៅដកលុយពីធនាគារ ។

សម្តេចធិបតី គូសបញ្ជាក់ទៀតថា រាជរដ្ឋាភិបាលមិនមានអស់ប្រាក់ដូចការបំផុសក្នុងចេតនាអាក្រក់នោះទេ ហើយមន្ត្រីរាជការបន្តបើកប្រាក់បៀវត្សរ៍ទៀងទាត់ជារាល់ខែផងដែរ។

ទន្ទឹមនឹងនេះ រាជរដ្ឋាភិបាលបានចំណាយប្រាក់ ដើម្បីសម្រួលដល់ការធ្វើដំណើររបស់ប្រជាពលរដ្ឋទៅលេងស្រុកកំណើតក្នុងឱកាសពិធីបុណ្យភ្ជុំបិណ្ឌបន្ថែមទៀត។

សម្តេចធិបតី អំពាវនាវដល់ពលរដ្ឋកុំបារម្ភថា រឿងរដ្ឋគ្មានលុយ និងអស់លុយឱ្យសោះ៕