លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយបានឱ្យដឹងនៅថ្ងៃទី២៨ ខែកញ្ញា ឆ្នាំ២០២៦ថា ស្ថានភាពគ្រោះទឹកជំនន់ គិតចាប់ពីថ្ងៃទី៨-២៧ ខែកញ្ញា ឆ្នាំ២០២៦ ប៉ះពាល់ដល់ខេត្តចំនួន១០ គឺខេត្តបាត់ដំបង , បន្ទាយមានជ័យ , សៀមរាប , កំពង់ធំ , កំពង់ចាម , ត្បូងឃ្មុំ , ប៉ៃលិន , ពោធិ៍សាត់ , ព្រះវិហារ និងខេត្តឧត្តរមានជ័យ ស្មើនឹង៥២ក្រុង-ស្រុក ។ លោកគូសបញ្ជាក់ថា ចំពោះប្រជាពលរដ្ឋបានប៉ះពាល់ចំនួន ៤៤,៨៨៩ គ្រួសារ ។

ក្នុងនោះ ជម្លៀសចំនួន ៣,៦៨៥ គ្រួសារ និងស្រូវចំនួន៤៩,៩២៥ ហិកតា ។ លោកបន្ថែមថា សម្រាប់ការអន្តរាគមន៍ ថ្នាក់ដឹកនាំ និងមន្ត្រីបច្ចេកទេសនៃគណៈកម្មាធិការជាតិគ្រប់គ្រងគ្រោះមហន្តរាយ បន្តចុះពិនិត្យតាមដានជាប់ជាប្រចាំនូវស្ថានភាពទឹកជំនន់ដែលប៉ះពាល់ខ្លាំងជាងគេ គឺនៅខេត្តបាត់ដំបង បន្ទាយមានជ័យ និងសៀមរាប។

ជាមួយគ្នានេះ រដ្ឋបាលខេត្តដែលមានគ្រោះទឹកជំនន់ ក៏មានភាពម្ចាស់ការក្នុងការដោះស្រាយ និងជម្លៀសប្រជាពលរដ្ឋពីតំបន់ដែលរងគ្រោះផងដែរទាន់ពេលវេលាផងដែរ ។

លោកសង្កត់ធ្ងន់ផងដែរថា ចំពោះស្ថានភាពទឹកទន្លេមេគង្គនៅស្ថានីយសំខាន់ៗភាគច្រើន នៅក្រោមកម្រិតប្រុងប្រយ័ត្ន និងមាននិន្នាការស្រកចុះ៕