ក្នុងឱកាសនៃការវិលត្រឡប់មកដល់ទឹកដីមាតុភូមិវិញរបស់ លោក ទីវ តារារិទ្ធ ដែលជាអ្នកជិះកង់ផ្សងព្រេងឆ្លងទ្វីបតែម្នាក់ឯង ដើម្បីរៃអង្គាសថវិកាជួយដល់កុមារកម្ពុជា ត្រូវបានទទួលស្វាគមន៍យ៉ាងកក់ក្តៅ និងអធិកអធមបំផុតពីសំណាក់ក្រុមគ្រួសារ មិត្តភក្តិ ក៏ដូចជាអ្នកគាំទ្រជាច្រើននាក់ ដោយមានទឹកភ្នែកនៃក្តីរំភើប និងស្នាមញញឹម បានលេចឡើងព្រមគ្នានៅព្រលានយន្តហោះអន្តរជាតិតេជោ កាលពីយប់ថ្ងៃទី ២២ ខែមិថុនា ឆ្នាំ ២០២៦។
លោក ទីវ តារារិទ្ធ បានលះបង់ក្តីសុខផ្ទាល់ខ្លួន ចាកចេញពីមន្ទីរពេទ្យកុមារអង្គរ ខេត្តសៀមរាប កាលពីថ្ងៃទី ៦ ខែមិថុនា ឆ្នាំ ២០២៤។ រយៈពេល ២ ឆ្នាំពេញនៃការរស់នៅលើកែបកង់ ឆ្លងកាត់ការលំបាក ឧបសគ្គ និងអាកាសធាតុគ្រប់បែបយ៉ាង លោកបានបំបែកកំណត់ត្រាធ្វើដំណើរឆ្លងកាត់ ៣ ទ្វីបដ៏ធំ (អាស៊ី អឺរ៉ុប និងអាហ្វ្រិកខាងត្បូង) ដោយឆ្លងកាត់ប្រទេសចំនួន ៤០ និងចម្ងាយផ្លូវសរុបប្រមាណ ៥៦ ០០០ គីឡូម៉ែត្រ។ ឆ្លងកាត់ការធ្វើដំណើរដ៏វែងឆ្ងាយនេះ លោកប្រមូលថវិកាសប្បុរសធម៌បានប្រមាណ ២២ ម៉ឺនដុល្លារអាមេរិក ដើម្បីយកមកជួយឧបត្ថម្ភដល់មន្ទីរពេទ្យកុមារអង្គរ និងមន្ទីរពេទ្យគន្ធបុប្ផា ដែលជាជម្រកសង្គ្រោះជីវិតកុមារកម្ពុជារាប់លាននាក់។
ទោះបីជាបេសកកម្មជិះកង់ត្រូវបានបញ្ចប់ ប៉ុន្តែទំហំថវិកាដែលជាគោលដៅធំគឺ ២៥ ម៉ឺនដុល្លារ នោះ គឺនៅខ្វះខាតប្រមាណ ៣ ម៉ឺនដុល្លារទៀត ទើបគ្រប់ចំនួន។
ក្នុងឱកាសមកដល់កម្ពុជាវិញនេះ លោក ទីវ តារារិទ្ធ ក៏បានធ្វើការអំពាវនាវយ៉ាងទទូចដល់មហាជនខ្មែរគ្រប់ទិសទី ជួយបន្តចូលរួមគាំទ្រ និងបរិច្ចាគតាមលទ្ធភាព ដើម្បីឱ្យថវិកាសប្បុរសធម៌នេះសម្រេចបានតាមគោលដៅ ១០០% សម្រាប់ជួយសង្គ្រោះកុមារតូចៗនៅក្នុងមន្ទីរពេទ្យទាំងពីរ។ ស្មារតីអង់អាច ក្លាហាន និងបេះដូងមនុស្សធម៌ដ៏ធំធេងរបស់ លោក ទីវ តារារិទ្ធ មិនត្រឹមតែបាននាំមកនូវថវិកាជួយដល់កុមារកម្ពុជានោះទេ ប៉ុន្តែថែមទាំងបានលើកតម្កើងទង់ជាតិ និងកិត្យានុភាពខ្មែរនៅលើឆាកអន្តរជាតិ ឱ្យពិភពលោកបានស្គាល់ពីទឹកចិត្តដ៏ទូលំទូលាយរបស់ជនជាតិខ្មែរផងដែរ។
ក្រោយពេលមកដល់កម្ពុជាវិញ លោកមានការងារសំខាន់ៗជាច្រើនដែលត្រូវធ្វើបន្ត រួមមាន៖ • ផ្តល់បទសម្ភាសន៍ផ្ទាល់ជាមួយបណ្តាញសារព័ត៌មាននានា ដើម្បីចែករំលែកបទពិសោធន៍។ • រៀបចំកម្មវិធីជិះកង់បន្តពីទីក្រុងភ្នំពេញ ឆ្ពោះទៅកាន់ខេត្តសៀមរាប។ • រៀបចំពិធីបិទកម្មវិធីជិះកង់សប្បុរសធម៌ជាផ្លូវការនៅមន្ទីរពេទ្យគន្ធបុប្ផា និងមន្ទីរពេទ្យកុមារអង្គរ។ • ផលិតខ្សែភាពយន្តឯកសារខ្លីស្តីពីការធ្វើដំណើរ៖ “២ ឆ្នាំជាមួយកង់ TWO YEARS ON A BIKE”។ • រៀបចំចងក្រងសៀវភៅការចងចាំ៖ “២ ឆ្នាំជាមួយកង់ TWO YEARS ON A BIKE”៕