|
គិតត្រឹមម៉ោងជាង ១២ថ្ងៃត្រង់ ថ្ងៃទី២៦ ខែកក្កដា ឆ្នាំ២០២៥នេះ យោធាឈ្លានពានសៀម បានបាញ់ផ្លោងគ្រាប់ចូលដែនអធិបតេយ្យកម្ពុជានៅតំបន់ថ្មដូន, តាក្របី, ភ្នំពើយ, អូរខ្លាឃ្មុំ និងអូរស្មាច់ ក្នុងភូមិសាស្ដ្រខេត្តឧត្តរមានជ័យ
ថ្ងៃទី ៖ 26-07-2025, ដោយ Dara007 , 111 Views
ឆ្លើយតបចំពោះភាពទន្ទ្រានឃ្លានពាននេះ កងទ័ពដ៏អង់អាចក្លាហានរបស់កម្ពុជា បានធ្វើការបាញ់តបតស្វ័យការពារយ៉ាងមុតមាំបំផុត ដើម្បីការពារដែនអធិបតេយ្យកម្ពុជា។
លោកស្រីឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ នៅព្រឹកថ្ងៃទី២៦ ខែកក្កដា ឆ្នាំ២០២៥នេះ ដែលត្រូវនឹងថ្ងៃទី៣ នៃសង្គ្រាមឈ្លានពានរបស់ថៃមកលើដែនអធិបតេយ្យរបស់កម្ពុជា បានអះអាងថា មកទល់ម៉ោងនេះ កងកម្លាំងប្រដាប់អាវុធដ៏អង់អាចក្លាហានរបស់កម្ពុជា កំពុងឈរជើងយ៉ាងរឹងមាំការពារដែនអធិបតេយ្យជាតិ។
ក្នុងសន្និសីទសារព័ត៌មានបង្ហាញបច្ចុប្បន្នភាព អ្នកនាំពាក្យក្រសួងការពារជាតិ បានសង្កត់ធ្ងន់ថា បើទោះបីមានការដាក់សម្ពាធ ការបន្ថែមកម្លាំងរបស់យោធាថៃយ៉ាងណាក្ដី ប៉ុន្ដែកងកម្លាំងប្រដាប់អាវុធរបស់កម្ពុជា មិនរួញរានឹងការគម្រាមកំហែងនេះឡើយ ពោលនៅតែការពារយ៉ាងរឹងមាំដែនអធិបតេយ្យកម្ពុជា មិនឲ្យបាត់បង់សូម្បីមួយមីល្លីម៉ែត្រនោះទេ។
រាជរដ្ឋាភិបាលកម្ពុជា កងទ័ព និងប្រជាជនកម្ពុជា រួមគ្នាជាធ្លង់មួយ៕
|