|
សំណេរ ធី សុវណ្ណថា រឿងទ័ព ត្រូវបញ្ចប់មុខតំណែងពីអភិបាលរងក្រុងអរិយក្សត្រ
ថ្ងៃទី ៖ 03-08-2025, ដោយ admin , 460 Views
ភ្នំពេញ : «ទ័ពយើងជួរមុខ ភាគច្រើនមានជំងឺលើសឈាម ទឹកនោមផ្អែម ក្រពះ ថ្លើម តម្រងនោម ដើមហេតុមកពីការផឹកស្រា» ។ នេះគឺជាសំណេរ អ្នកនាង ធី សុវណ្ណថា ភិបាលរងក្រុងអរិយក្សត្រ ដែលត្រូវសម្ដេចតេជោ ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា បង្ហោះនៅលើបណ្ដាញសង្គម និងប្រាប់ទៅលោក គួច ចំរើន ប្រធានគណបក្សខេត្តកណ្តាល ឲ្យបណ្តេញចេញពីគណបក្សប្រជាជនកម្ពុជា និងប្រាប់ទៅលោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃឲ្យ
បញ្ចប់មុខតំណែង ។
យោងតាមសំណេររបស់សម្ដេចតេជោ ហ៊ុន សែន «យើងគ្មានពេលអប់រំមន្ត្រីដែលគ្មានវិន័យក្នុងពេលដែលកិច្ចការជាតិកំពុងទាមទារយើងដោះស្រាយនោះឡើយ។ ម្តងហើយម្តងទៀត ធី សុវណ្ណថា បាន បង្ហោះសារតាមFacebook ដែលមានចរិតមិនសមស្រប។ ខ្ញុំផ្ទាល់បានហៅទូរស័ព្ទប្រាប់គាត់ឲ្យ លុបចោលនៅអត្ថបទ២កាលពីប៉ុន្មាន ថ្ងៃមុន។ ថ្ងៃនេះគាត់បង្ហោះសារប៉ះពាល់ដល់ កងទ័ពក្នុងពេលកងទ័ពកំពុងការពារ ទឹកដី» ។
ក្នុងនាមប្រធានគណបក្សកាន់អំណាច សម្ដេចតេជោ ហ៊ុន សែន បញ្ជាក់ទៀតថា «ខ្ញុំបានប្រាប់ទៅឯ.ឧ គួច ចំរើន ប្រធានគណបក្សខេត្តកណ្តាល ឲ្យបណ្តេញចេញពីគណបក្សប្រជាជនកម្ពុជា។ ខ្ញុំបានប្រាប់ទៅឯ.ឧ ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃឲ្យ បញ្ចប់មុខតំណែង ធី សុវណ្ណថា ពីអភិបាលរងក្រុងអរិយក្សត្រនិងបណ្តេញចេញពីក្របខ័ណ្ឌរដ្ឋទាំងអស់។ ក្នុងឋានៈជាប្រធានគណបក្សកាន់អំណាច ខ្ញុំមានសិទ្ធិនិងធ្វើបែបនេះ ដើម្បីរក្សាវិន័យបក្សសម្រាប់មន្ត្រីដែលជាសមាជិកបក្សទាំងអស់» ៕
|